Lelo frankista bat dago Mañuetako udal eraikin bateko leihoburuan, Araban: 36ko gerran militar kolpisten alde aritutako lau bizilagunen izen-deiturak ageri dira, eta horien azpian, Caídos por Dios y por España esaldia (Jainkoaren eta Espainiaren alde eroriak). Espainiako Gobernuak Araban duen ordezkaritzak eskaera formal bat igorri zion udalari kendu zezan, Memoria Demokratikoaren Legea aintzat hartuta. Bertan, udal agintariei galdegin zien izkribu frankista ezabatzea, eta hilabete bateko epea eman zien horretarako. Alta, Mañuetako alkateak, PPko Francisco Javier Garciak, uko egin dio agindua betetzeari.
El Correo egunkariari eginiko adierazpenetan, Garciak argudiatu du goiburua «betidanik» dagoela eraikin horretan, eta ez duela «inor gogaitzen». Hortaz, iragarri du leloa ez duela «borondatez» kenduko: «Jaso nuen ohartarazpen bat, bai, duela bizpahiru hilabete. Berdin dio. Ez dut kenduko izkribua. Horretara behartzen banaute... Baina ez dakit nola egin dezaketen halakorik», kontatu du PPko kideak.
Horiek horrela, Espainiako Gobernuak EAEn duen ordezkari Marisol Garmendiak esku hartuko du auzian. EFE agentziaren arabera, gobernu ordezkaria Estatuaren abokatuarekin bilduko da heldu den astean, aztertzeko nola betearaziko duten Memoria Demokratikoaren Legea.
