Mariano Herrero Monteagudoko alkatea da gaurtik Nafarroako udalen eta kontzejuen elkarteko lehendakari berria, gaurko ezohiko batzarrean erabaki dutenez. UPNko kidea da.
Bost hautagai zeuden denera, eta inork ez du lehen bozketan gehiengo osorik lortu. Bigarren itzulia egin behar izan dute, baina horra ez dira aurkeztu Funesko eta Enerizko alkateak —aurrenekoan bai—. Herrerok 485 boz erdietsi ditu, Jose Mari Irisarri Berriobeitiko alkate independenteak 279 eta Gregorio Galilea Vianako alkateak (PSN) 268. Irisarri izango da elkarteko lehen lehendariordea eta Galilea bigarren lehendakariordea.
Udalen finantzaketa izango da Herreroren lehentasunekoa, berak esan duenez.
22 lagunek osatuko dute Nafarroako udalen eta kontzejuen elkarteko zuzendaritza.
