Emaitza txarrak izan ditu PSE-EEk legebiltzarrerako hauteskundeetan: hamasei eserleku zituen, eta bederatzi lortu ditu oraingoan. Zuzendaritzako kideek zer gertatu den ondo aztertu beharra dagoela uste dute, eta aurrera begira aldaketak egin beharko direla. Horretaz guztiaz hitz egin eta eztabaidatzeko nazio batzordea egingo dute urriaren 5ean.
"Egoera politikoaren zatikatzeak" kalte egin diela azaldu du Mendiak, eta ez du uste "euskararen inguruko polemikak" eraginik izan duenik emaitza txarretan. Ez du bere burua egiten egoeraren erantzule, eta, beraz, ez duela dimitituko esan du Mendiak: "Sostengu keinu asko jaso ditut; ez dut dimisiorik emango".
Historiako emaitzarik txarrenak lortu ditu PSE-EEk: 1980ko lehen hitzorduan %14 lortu ostean eta 2009ko %30,7koa kontuan hartzeke, %17-%23 artean ibili da, 12-19 aulki artean. Orain, bederatzi lortu ditu, %11,9rekin. Ia 87.000 boto gutxiago.
EAJk egin asmo duen bilera errondan parte hartuko dutela esan du Mendiak, baina, jeltzaleek zer proposatuko dieten ez dakitenez, ez dakiela zertara iritsiko diren. Beraiek "agenda soziala" eramango dute bilerara.
