Euskal instituzioetako ordezkaritza zabala izan zen sari banaketan. Andoaingo Udalaren izenean, Ane Carrere alkateak hartu zuen hitza. «Bidegile eta bide erakusle izan diren hamar mugarri ezagutzera eman eta goraipatu nahi izan ditugu». Adierazi zuen, ordea, ez daudela atzera begira. «Aurrera begira gaude, eta Rikardo Arregi Kazetaritza Sariak izango du 31. edizioa, eta beste edizio asko. Eta, gainera, indarberrituta etorriko da. Hori da udalaren konpromisoa». Eusko Jaurlaritzatik ordezkaritza nagusia Kultura eta Hizkuntza Politikako sailburu Bingen Zupiriak hartu zuen bere gain. «Hiru hamarkada hauetan euskarak azken mendeotako biziberritzerik azpimarragarriena bizi izan du», adierazi zuen. «Bide horretan, funtsezkoa izan da hedabide publiko zein pribatuek egin duten ahalegina euskarazko kalitatezko informazioa eta entretenimendua euskal herritarrengana helarazteko».
Nafarroako Gobernuaren izenean, Herritarrekiko eta Erakundeekiko Harremanetako kontseilaria izan zen sari banaketan, Ana Ollo. Nafarroako Gobernuko hizkuntza politikaren arduradun eta Euskarabideko zuzendari Mikel Arregi ere izan zen. Arabako Foru Aldunditik Euskara, Kultura eta Kirolak Saileko Igone Martinez de Luna joan zen, eta euskara arloko zuzendariak Gipuzkoa eta Bizkaiko diputazioetatik, Garbiñe Mendizabal eta Ana de Castro, hurrenez hurren. Ekitaldia Rikardo Arregi zenaren hitz batzuekin hasi zuten; 1966. urtean jasotakoak, Usurbilen (Gipuzkoa), Udarregi bertsolariari egindako omenaldi batean. Suhartasuna agerikoa zen haren hitz egiteko eran. «Euskal idazle berrien» izenean ari zen, iragana goratuz, baina iturri berri izateko asmoa argiarekin: «Ez lehengoa bizi nahian». 1942an jaio zen Rikardo Arregi, Andoainen; euskaltzale sutsua izan zen, alfabetatzearen eta euskarazko kazetaritzaren hauspo ezinbestekoa. Gazterik hil zen, 1969ko uztailean, auto istripu batean. Presente egon zen atzo.
Saria ematen
Ekitaldi oso sentitua izan zen, eta ahalegina egin zuten, gainera, zentzua emateko sari bakoitzari. Hedabideen jardunean giltzarri izan diren pertsonak hautatu zituzten sariak emateko; era horretan, iragan hamarkadetako mosaikoa oraindik ere gehiago osatzen ahalegindu ziren antolatzaileak. Dani Alvarez eta Ilaski Serrano izan ziren ekitaldiaren aurkezleak. Lehenak esan zuen euskara hutsean egiten zuen lehen ekitaldia zela; pozik. Hunkigarria izan zen oso sari banaketa. Hainbat hedabidetako ordezkariek, esaterako, hildako kide maiteak ekarri zituzten gogora. Joxemi Zumalabe oroitzeko irudi batekin joan ziren saria jasotzera, adibidez, Argia-ko kideak; BERRIAko zuzendari Martxelo Otamendik bidean izandako hainbat lagun zendu oroitu zituen, une zailak. Aurrera begira ere jarri nahi izan zuen, eta gogora ekarri zuen zer garrantzi duten instituzioek bidean pauso irmoz jarraitzeko. «Jaurlaritzaren, aldundien eta gure sektorea biltzen duen Hekimenen artean lantzen ari diren akordioa». Hortxe ipini zuen gero hoberako esperantza.
Euskal kazetaritzaren historiaren berri emateko ondu duten
[youtube]https://youtu.be/FgrCBBM_7uw[/youtube]
