Kristalezko ikurrak 1,5 metroko diametroa du, eta Alberto Chueca Lenzanok egin du. 1841etik 1951ra bitartean izan zuen itxura berrezartzeko, ereinozduna kentzen hasi ziren iazko irailaren 26an. Sei zatitan banatu eta eraikinetik kenduta, Bianako Printzea instituzioaren biltegira eraman zuten ikurra. Gaur amaitu dute prozesua, Nafarroako armarria jarriz.
Gurutze ereinozduna Espainiako armadaren saririk preziatuena da, eta Francisco Franco diktadoreak bere alde borrokatu ziren zenbaiti banatu zien. 1937an eman zion San Fernandoko gurutze ereinozduna Nafarroari, 36ko gerrara joandako boluntario nafarrek kolpe militarrari emandako babesagatik eta gerran egindakoengatik. 1951n, Nafarroako Jauregiaren frontoian eskultura egin zuen Fructuoso Ordunak. Bertan, janzkera klasikoa duten bi gizonen artean Nafarroako armarria dago gurutze ereinozdun horrekin. Hau da, eskultura bateratua da: ez zitzaion ereinozduna hasierako eskulturari gehitu, baizik eta hasieratik hala diseinatu zen.
Nafarroako Memoria Historikoaren Legeak behartu egiten du ereinozduna eraikin publikoetatik kentzera, baina UPNren gobernuak sistematikoki uko egin zien kentzeko eskaerei. Lege hori betetzeko urratsak egin izan ditu lauko gobernuak; besteak beste, Memoria Historikoari buruzko Koordinazio batzorde teknikoak 224 ikur frankista identifikatu zituen Nafarroan. Batzorde horrek emandako gomendioen artean zegoen ereinozduna kentzea.
Gobernuak iazko azaroan sinatu duen akordioaren arabera, "Nafarroaren memoria demokratikoa" berreskuratzea da asmoa, eta "bakea, elkarbizitza, askatasuna eta demokraziaren balioen kontra" doazen ikurrak espazio publikotik kentzea.
Oroimenari lotuta emandako beste pauso bat izan zen Iruñeko Erorien Monumentuko kriptan hobiratutakoen arrastoak bertatik ateratzea. Jose Sanjurjo eta Emilio Mola buruzagi frankisten aztarnak zeuden bertan, besteak beste.
