Oleguerri etendako kontratua ordaintzera zigortu dute Kelme

49.608 euro eta atzerapenak sortutako interesak ordaindu beharko dizkio Kelme kirol arropa markak Oleguer Presas Bartzelona taldeko futbol jokalariari. Izan ere, Oleguerrekin zuen publizitate kontratua alde bakarrez eta arrazoirik gabe hautsi zuela erabaki du Elxeko (Alacant, Herrialde Katalanak) epaile batek.

BERRIAn eta Kataluniako Directa astekarian Fede ona izeneko artikulua plazaratu zuen futbol jokalariak, iazko otsailaren 7an, Iñaki de Juana Chaos ETAko presoa gose greban zegoela-eta haren eskubideen alde.

Oleguerrek iritzi hori idatzita beren irudia kaltetu zuela erabaki zuen Kelmek, eta publizitate kontratua eten zuen. Kelmeren erabaki horren harira, Kelmek bezero gisa galdu nau kanpaina jarri zuten abian, eta egun batzuren buruan, 18.170 lagunek bat egin zuten ekimenarekin.

Epaileak argudiatu du kirol arropa markak ez zuela ondo jokatu kontratua bertan behera uztean, batetik ez duelako zehazten irudian izan zituen kalteak zeintzuk izan ziren, eta, bestetik, Oleguerrek ez zituelako artikuluan De Juanaren ekintzak babesten, baizik eta gose greban zegoela-eta haren eskubideak.

Kelmeren kontratu etetea ez ezik, erreakzio zaparrada eragin zuen futbol jokalariaren artikuluak. Komunikabide askok, batik bat, Madrilgoek, kritika gogorrak egin zizkioten. Bestalde, ordea, elkartasun mugimendua ere sortu zen.