Otegi: "Alderdien Legeak espreski eskatzen dituen baldintzak bete egin ditu ezker abertzaleak"

ASB Abertzale Sozialisten Batasuna alderdia eratuz eta erroldatuz Espainiako Alderdien Legea bete dutela azaldu du Arnaldo Otegik. Alderdien Legea "antidemokratikoa" dela azpimarratu du, baina egun gatazka konpontzeko aukera zaballik dagoenez "ardura eta zorroztasun handiz" jokatzeko unea dela iritzi dio, eta ardura eta zorroztasun horien baitan kokatu du Alderdien Legeari men egitea.

Halaber, Alderdien Lege "antidemokratikoari" tresna "demokratikoekin" erantzuteko erabakimena dutela erantsi du, eta horregatik ere egin dutela betetzeko hautua. Era berean, keinu horrek ezker abertzaleak prozesuarekin duen konpromisoa berresten duela esan du, eta, areago, prozesua martxan jartzeko beste urrats bat dela.

Hain zuzen ere, konponbideaz eta prozesuaz aritu direnean, ezker abertzaleak hiru oinarri ezarri dituela agertu du: batetik, gatazkaren sustraietara jo behar dela. Bestetik, setkore guztiek berdintasunean parte-hartzeko aukera izan behar dutela. Hirugarrenik, indarkeriarik gabeko eszenatoki batean gauzatu behar dela. Hiru oinarri horiekin koherente jokatu dutela nabarmendu du Otegik, eta bide horretan etorri direla Anoetan prozesurako metodologia aurkeztea eta Anaitasunan eduki politikoaren zati bat.

Oraingoan, bigarren premisari heltzea dagokiola iritzi dio, eragile guztiek berdintasunean parte hartu behar dutela dioenari. Horrenbestez, berdintasunean parte hartzeko aukera horren baitan kokatu du Otegik Alderdien Legea betetzeko erabakia.

Urrats hori eginda, prozesua abian jartzeko osagai guztiak mahai gainean daudela azpimarratu du, eta orain aurrera eramateko borondatea behar dela. Une erabakigarria aintzat hartuta arduraz jokatzeko eskatu die gainerako eragile politikoei.