Donostiako Polloeko hilerrian izan da Arnaldo Otegi EH Bilduko lehendakarigaia, Doris Benegas ezkerreko militantearen ehorzketan. Otegik berak hitza hartu du, eta azaldu Benegas feminista zela eta "herri honekin eta aldaketa sozialarekin konprometitua" zegoela. Luis Ocampo Benegas zenaren bikotekideak eta Miguel Castells abokatuak ere hitz egin dute.
Kazetariek inhabilitazio aukeraz galdetuta, Otegik ohartarazi du "azken muturreraino" joko dutela aurrera bera lehendakarigai izateko erabakiarekin: "Tamalez, ezker independentista ohituta dago betoetara eta jazarpenera".
Otegik "hautagai izateko eskubidea" duela esan du Koldo Mediavilla EAJko Alor Instituzionaleko arduradunak ere. Espainiako auzitegiek kargu publikorako inhabilitazioa ezarri zioten Otegiri Bateragune auzian.
