Maltako Gobernuko agintarien eta oposizioko politikarien ustelkeria auziak ikertu eta azaleratzen zituen Daphne Caruana Galizia kazetariak. Zorrotz aritzen zen daphnecaruanagalizia.com blogean, batzuen eta besteen kontra. 53 urte zituela hil zuten, astelehenean, bonba itsatsi batekin. "Maltako bizitza publikoa gizon arriskutsu ezegonkorrez betea dago. Printzipiorik eta eskrupulurik ez duten politikariz betea", idatzi zuen blogean berriki. "Lotsagarriak edonon daude. Egoera amorragarria da", idatzi zuen azkeneko artikuluan.
Erreakzioak sortu ditu Caruanaren hilketak. Joseph Muscat Maltako lehen ministroak "prentsa askatasunaren aurkako eraso gogortzat" jo du gertatutakoa. "Ez dut atsedenik hartuko auzi honetan justizia egin arte. Gure herriak justizia merezi du", gaineratu du. Caruanak lehen ministroaren eta haren emaztearen inguruko artikuluak idatzi zituen, eta Panamako enpresa batetik dirua nola lortzen zuten azaleratu zuen.
Antonio Tajani Europako Parlamentuko presidenteak esan du hilketa "basatia" izan dela. "Caruana Galizia kazetariak bere bizitza sakrifikatu du, egiaren bila. Ez da ahaztua izango".
Julian Assangek 20.000 euroko saria eskaini du kazetariaren hiltzaileen inguruko informazioa ematearen truke.
