Elkarrekin Podemosek egindako proposamenaren zuzenketa bat onartu dute Eusko Legebiltzarrean, gaurko osoko bilkuran. EH Bilduk eta Elkarrekin Podemosek berak ados jarri ostean aurkeztutako zuzenketa. Bi talde horietako legebiltzarkideek ez ezik, PSE-EEkoek ere babestu dute testua.
Eskatzen dutena argia da: Espainiako Aurrekontuak ez onartzea pentsioak KPIaren arabera eguneratzea onartu ezean, eta gutxieneko pentsioa pobreziaren mugaren gainetik jartzen ez bada.
2017ko Espainiako aurrekontuek euskal gizarteari eta zehazki pentsiodunri kalte egiten diela dio onartu duten testuan. Han eman baitzitzaion bide pentsioak %0,25 besterik ez igotzeari. EAJren babesarekin onartu zituzten aurrekontu horiek.
Iaz onartutako aurrekontuek eta aurten onartu nahi dituztenek "muturreko austeritate politikak" bultzatzen dituztela eta gizarte arrakala sakontzen dutela salatu dute.
EAJk eta PPk testuaren kontra bozkatu dute, aurrez aipatutako puntu horietan. EAJk, baina, onartu egin du mozioaren azken puntua. Han, martxoaren 1ean egin zuten legebiltzarreko akordioa berresten da, eta han pentsioak KPIaren arabera eguneratzeko eskatzen zen.
