Prentsa askatasuna eta, "pertsonok libreki dugun pentsatzeko eta esateko eskubidea" izan dira aste honetako trixerta diseinatzeko gaia. Izan ere, Espainiako Herritarren Segurtasunerako Legeak kazetarien jarduna oraindik ere estuago hartzea ekarriko du: isilarazteko. Buatxabalek egin du aste honetako elastikoaren irudia. Hondo grisa edo beltza dituen elastikoak egingo ditu.
25 euro balioko dute elastikoek —etxerako bidalketa eta BEZa barne—, eta BERRIAlagunek %10 merkeago izango dute: 22,5 euroan. www.berria.eus/trixertak helbidean erakutsiko dira diseinu berriak, eta hor bertan erosi ahal izango dira kamisetak. Baita telefonoz ere: (0034) 943-30 43 45.
BERRIAk euskal sortzaileekin elkarlanean abiatutako egitasmoa da. Txanda honetan, Zaldieroa, Savanna Studio, Unai Iturriaga eta Buatxabal sortzaileek bihurtuko dituzte BERRIAko albisteak kamiseta. Sortzaileak arduratuko dira sormenaren arloaz, Oninart estudioak egingo ditu ekoizpen lanak eta elastikoak BERRIAk hedatuko ditu.
Ostegunero elastiko berriak
Baina nola hautatuko da albistea? Astelehenean, aurreko astean egunkariko irakurgaietatik nabarmendutako albisteak aztertu, eta asteko gaia zein izan den adostuko dute BERRIAk eta sortzaileak elkarrekin. Ez dute zertan albisterik garrantzitsuenak hautatu, izan daiteke titulu bat edo asteko gai bat. Asteazken eguerdirako BERRIAk marrazkia jasoko du, eta ostegunero aurkeztuko dira elastiko berriak.
Euskal sortzaileek propio erosleentzat egindako elastikoak eskatu ahala inprimatuko dituzte, eta eskatzaileari etxera iritsiko zaio zuzenean, erosi eta hamar eguneko epean. Aurreko asteetan kaleratutako kamisetak ere eskatu ahal izango dira.
