PUNPA EUSKARAREN ALDE

Baloiak Seaskaren aldeko punpa egin zuen atzo Donibane Lohizuneko Kexilo futbol zelaian, Lapurdin. Hego eta Ipar Euskal Herriko futbolari profesional ohiek eta goi mailako talde amateurretako jokalari ohi ugarik hartu zuten parte; horien artean, Bordeletik, Realetik edo Athleticetik pasatu diren jokalariak. Hegoaldekoek irabazi zuten: 7-0. Paxkal Indo Seaskako lehendakariaren ondoan izan ziren Martin Garitano Gipuzkoako ahaldun nagusia eta Kotte Ezenarro departamentuko Kontseilu Nagusiko lehendakariordea. Indok balorazio «aski ona» egin du ekimenari buruz.