Etxeratek eta Egin Dezagun Bideak deituta, 17:30ean, Karmele Solaguren bizi zen Barañaingo San Esteban kaletik Julian Retegi frontoiraino manifestazioa egin zuten. 18:30ean, eserleku guztiak betetako frontoian, bi ordu inguru iraun zuen ekitaldia egin zuten, eta bereziki sakabanaketa salatu zuten.
Km 0, sakabanaketaren mila aurpegiak dokumentala eskaini zuten. Astebururo ehunka kilometro egin behar izaten dituzten presoen senideen hogei testigantzatik gora biltzen dira bideoan, eta ñabarduraz betetako istorio horietan, euren bizipenak hezurmamitzen dituzte, sakabanaketak euren bizitzetan zer esan nahi duen azalduz. Bideoaren lau minutuko aurrerapen bat ateaireki.com
Ondoren bertsolariak, dantzak, kantak, Fertxu Izquierdoren olerki bat... Berezia izan zen gutunen eszenaratzea: frontoia ilunpetan, fokuek mahai batean idazten ari zen pertsona bat argiztatu zuten, eta bozgorailuetatik hainbat presok bere egunerokoan senideei idatzitako hainbat gutun irakurri zituzten. Gero, seme bat Galiziako espetxean eta beste bat Valentzian duen Jokin Azkonak ere hartu zuen hitza eta «bihotz-bihotzez» eskerrak eman zizkien laguntza eta elkartasuna adierazten dieten bizilagun guztiei.
Hotz egiten zuen kanpoan, baina frontoiko giroa berotu egin zen batez ere Sara Fernandezen ahizpa Ana Fernandezek eta Karmele Solagurenen senar Jose Luisi lore sorta bat eman zietenean. Jose Luis gaixo egon arren, aulkitik altxatu eta besoa astindu zuen, frontoian zirenek, zutik, txalo zaparrada eskaintzen zioten bitartean. Euren memoria aldarrikatu zuen Ana Fernandezek.
Egin Dezagun Bidea mugimenduko Fran Baldak gaixotasun larriak edo zigorraren hiru laurdenak beteak dituzten presoak etxeratzeko eskatu zuen. Gizartearen gehiengoak mezu horrekin bat egin arren, lanean jarraitzeko beharra azpimarratu zuen, eta urtarrilaren 7an Bilbon egingo den manifestaziora deitu zuen.
