Iruñeko Sanferminetako protagonisten artean daude kilikiak eta zaldikoak. Kalez kale ibili ohi dira, haurren atzetik, horiek izutzen. Kilikietan beldugarriena eta ezagunena da Caravinagre, 1941. urtean sortutako pertsonaia.
Aurten horiei euskaraz xaxatzeko formulak asmatu dituzte. Euskarabideak eta Iruñeko Udalak sakelako liburuxka bat argitaratu dute Iruñeko Erraldoien eta Buruhandien Konpartsaren gainean. Liburuxka horretan, 2017ko sanferminetan konpartsak eginen dituen ibilbideak azaltzen dira, baita zenbait kanta ere, haurrek hain kutun dituzten Konpartsako pertsonaiei eskainiak. Horrela dio kilikiak zirikatzeko asmatutakoak: "Kiliki-kalaka, zinpi-zanpa korrika".
Zaldikoei dagokienez, sei dira, eta buruhandi eta kilikiekin atera ohi dira. Horiei ere zirikatzeko modua sortu dute euskaraz: "Zaldiko maldiko, ez zara etorriko. Zaldiko maldiko, putza betiko".
Sanferminetan ZALDIKOAK xaxatzeko formula. pic.twitter.com/yCjYNTPsLf
— Gaizka Aranguren (@gaizkaranguren) 2017(e)ko ekainak 20
Gaizka Arangurenek sareratu ditu bideoak Twitterren, eta dei egin du haurrak dituzten gurasoei bideook bidaltzera, umeek ikas ditzaten euskarazko formulak.
