Nafarroako suhiltzaile zenbaitek azterketa teorikoa egin dute gaur, mailaz igotzeko. Euskaldunak dira probara aurkeztu direnetako asko, baina gaztelaniaz eginarazi diete azterketa osoa. Duela hilabete batzuk, gauza bera gertatu zen suhiltzaile izateko oposizioko azterketan: prozesu osoa erdara hutsean egin behar izan zuten hautagaiek. Hori salatzeko, elkarretaratzea egin dute gaur Cordovillako parkean (Nafarroa), LAB sindikatuak deituta.
«Mailaz igotzeko probak euskaraz egin nahi ditugu, baina Nafarroako Gobernuak ez dio erantzunik ematen eskaera horri», esan du Mintxo Astiz suhiltzaile eta LABeko ordezkariak. Oposizioko azterketak, lekualdatze lehiaketak eta mailaz igotzeko proba guztiak gaztelaniaz egin dituztela salatu du. «Eskaerak egin ditugu egoera horri konponbidea eman diezaioten, baina ez dugu erantzunik jaso». Araban, Bizkaian eta Gipuzkoan, adibidez, probak gaztelaniaz edo euskaraz egiteko aukera eskaintzen zaie hautagaiei. Nafarroan, «suhiltzaileen herenak» euskaldunak diren arren, gobernuak ez du aukera hori ematen.
Zonifikazioak kaltetuta
Lanpostua Oronoz herrian du Astizek, eremu euskaldunean, eta esan du hor hizkuntza eskakizunak indarrean direla. Ez, ordea, eremu mistoko edo ez-euskalduneko suhiltzaile parkeetan: «Altsasun, Oronozen eta Auritzen kontuan hartzen dute euskararen ezagutza azterketak egiteko garaian, baina Iruñerrira lekualdatzeko, adibidez, ez», esan du. Izan ere, lekualdatze lehiaketa gehienetan, euskara jakiteak ez du punturik ematen; bai, ordea, alemanak, frantsesak eta ingelesak. Nafarroa osoko herritarrek «zerbitzua euskaraz jasotzeko eskubidea» dutela gaineratu du Astizek: «Eta hori ez da bermatzen ari».
LAB sindikatuak ohar bidez salatu du «borondate falta» dagoela arazoaren oinarrian: «Suhiltzaile-kabo izateko azterketa teorikoa euskaraz egin ahal izateko, adibidez, nahikoa da galderak eta erantzunak itzultzea. Administrazioak berak erraz egin lezake hori Euskarabidea institutuaren bidez, horretarako borondaterik balego, noski. Baina, zoritxarrez, berriro ikusi dugu ez dagoela halakorik». Nafarroako Gobernuak euskaldunen hizkuntza eskubideak errespetatzeari «uko» egiten diola gehitu du LABek: «Bidegabekeria latza da, erabateko diskriminazioa».
