Alba Garcia Sumarreko lehendakarigaia eta Lander Martinez Bizkaiko diputatua Bilbon izan dira gaur, alderdia egitekoa den sortze batzarrean hizpide izango dituzten dokumentuez eztabaidatzeko. Hain justu ere, Espainiako Sumarren talde koordinatzaileko kide izango da Garcia, eta alderdiaren geroaz mintzatu da Bilboko ekitaldian: «Orainean eta etorkizunean pentsatzen duen proiektu bat izatea funtsezkoa da. Eta guk proiektu hori badaukagu, ideia berri eta freskoekin, mende honetako erronkei aurre egiteko».
Eusko Legebiltzarrerako hauteskundeei so, alderdiak defendatzen duen eredua aldarrikatu du Garciak, EH Bilduren eta PSE-EEren «eredu zaharkituaren» aldean. «EH Bilduk EAJren eskutik eta zezenketetara eraman nahi gaituen Anduezarekin batera joan nahi badu, hemen gaude gu publikoa, berdea eta justizia soziala defendatzeko».
