Kanboko herriko kontseiluko gehiengoak deiturik, ehun bat lagun bildu ziren herriko etxearen aitzinean astearte arratsean, Christian Deveze auzapeza sostengatu asmoz eta hautetsiek Frantzian jasandako erasoen salatzeko.
Ikusi gehiago
Sostengua adierazi ziotenen artean agertu ziren Fabrice Rosay, Baionako suprefeta, Jean-Rene Etxegarai Euskal Hirigune Elkargoko lehendakaria, Alain Sanz Pirinio Atlantikoetako auzapezen elkarteko lehendakari biarnesa eta beste zenbait auzapez, hala nola: Lapurditik Claude Olive (Angelu), Jean-Francois Hirigoien (Donibane Lohizune), Emmanuel Alzuri (Bidarte), Kotte Ezenarro (Hendaia) edo Alain Dubois (Makea). Devezek «kontsolatua eta hunkituta» zela erran zuen.
Iragan asteazkeneko Kanboko herriko kontseilura agertu ziren Marieneko laborantza lurretan eraikitze egitasmoaren kontrako laurogei bat laborari eta herritar. Bi orenez joare eta zoru gaineko makilakaden azantz artean egon ondoren, auzapezak bilkura gelditu zuen; gelatik ateratzerakoan, jendarme, protestari eta hautetsi arteko sorka bat gertatu zen, eta auzapeza lurrera erori.
Nahi Dugun Herria oposizioko taldeko hautetsiek, ELBk eta Lurzaindiak biharamunean adierazi zuten ez zela auzapezaren kontrako «erasorik ez irainik» izan, eta «oreka galdu» eta «erori» zela. Zenbait hautetsik Frantzian hautetsi batzuek jasan erasoekin egin duten «nahasketa» salatu zuten. Devezek berak aitortu du, geroztik, bultzada izan dela, baina ez dela batzuen eta besteen arteko aharrarik izan.
Ikusi gehiago
Peio Etxelekuk eta Jean-Francois Lacostak ere, Marieneko lurren auziaren ondorioz Devezen gehiengotik atera ziren Kanboko hautetsiek, adierazi zuten laborariek ez zutela izan bortizkeria xederik, eta Marieneko aferan kudeaketa lasaiago baterako deia egin dute, baita Euskal Elkargoko buru Etxegarairen bitartekaritza eskatu ere.
