Tolosaldeko alkateen ustez, Darpon gezurretan ari da

Jon Darpon Eusko Jaurlaritzako Osasun sailburuari erantzun diote Tolosaldeko 30 alkatek, eta «gezurretan eta gauzak nahasten» ari dela leporatu. Otsailaren 15ean manifestazioa egin zuten Tolosan (Gipuzkoa), osasun arreta «kalitatezkoa eta publikoa» eskatzeko. Herenegun, hantxe bertan izan zen Darpon, Asuncion erietxe pribatuari babesa agertzeko. Protesta mugimenduaren helburua osasun publikoaren «izen ona zikintzea» dela esan zuen.

2011ko azaroaren aurretik zerbitzuen kontzertazio egoera zegoen Asuncion klinikan. «Egungoa, aldiz, pribatizazio egoera bat da, osasun etxeetan eskaintzen ziren zerbitzuak klinika pribatu baten eskuetan gelditu eta osasun etxeetatik kendu diren unetik», azaldu dute alkateek. Jaurlaritzaren hitzarmenaren urteroko 20 milioi euroak nola gastatzen diren jakin nahi dute.

Tolosaldeko alkateen izenean, Ibai Iriartek eta Luisa Uzkudunek adierazi dute «gogorra» dela ulertzea sailburuak alkateei «muzin egiten» jarraitu eta ondoren komunikabideen bitartez erantzuna ematea. Gogorarazi dute bilera eskaerak egin dizkiotela eta «entzungor» egin duela.

Alkateen iritziz, adierazgarria da Darponek Tolosaldean husten ari diren osasun etxeetan sartu-irten «azkarra» egitea, eta bisita nagusia Asuncion klinika pribatuan izatea. «Horrek argi adierazten digu sailburuak zerbitzuaren muina klinika pribatuaren eskuetan uzteko asmoa duela». Pribatizazioaren alde egitea leporatu diote sailburuari.

Eskualdeko alkateek adierazi dute eskua luzatzen diotela Darponi, osasun zerbitzuaz hitz egin eta lanerako mahaia osatzeko.