Atzo gauean, 21:00ak aldera, udaltzainak Gasteizko Gaztetxean sartu ziren bertan zeuden gazteak identifikatzera, eta espedientea ireki zien eraikinean bilduta egoteagatik. Udaltzainek 30 lagun inguru identifikatu zituzten, argudiatuta «gazteen lonja» bat zela eta ez zutela lizentziarik irekita egoteko. Koronabirusagatik debekatuta dago gazteen lonjetan biltzea, eta horregatik jarri zieten isuna, Udaltzaingoak jakinarazi duenez. Isunen behin betiko zenbatekoa Eusko Jaurlaritzak erabaki beharko du, baina, oraingoz, 600 eurorainoko isunak izan daitezke.
Gaztetxeko Asanbladak prentsaurrekoa eskaini du gaur eguerdian, gertatutakoari buruzko bere bertsioa azaltzeko. Asanbladako gazteek adierazi dute hasiera-hasieratik osasun neurriak errespetatu dituztela, baita bertan biltzen diren kolektibo guztiei neurrien berri eman ere. «Udatik hona, higiene pertsonal eta logistikorako neurriak hartu ditugu, eta kutsatze posibleen aurkako protokolo bat diseinatu». Atzo, zehazki, Gaztetxean zeuden 30 pertsonak gela ezberdinetan batuta zeudela azpimarratu dute, eta protokoloaren arabera segurtasun neurriak mantendu zituztela.
Gaztetxeko kideek salatu dute poliziaren jokaera «guztiz politikoa» izan dela: «Pandemia egoera eta osasun neurrien bermatzea aitzakia harturik, antolakuntza politiko ororen errepresio eta jazarpen zuzena pairatzen ari gara». Horrez gain, gaitzetsi dute jazarpenaren bitartez gazteen antolakuntza forma ororen «infantilizazioa eta kriminalizazioa» bilatzen dela, eta gazteria lan produktibora eta jai eredura lerratuta egotea nahi dutela. «Argi daukagu estatuaren boterea zalantzan jartzen duen oldarraldi eta antolakuntza politiko oro kondenatua eta jazarria izango dela. Honen adibide argia da atzo Gasteizko Gaztetxean pairatu genuen erasoa, baina baita Euskal Herriko txoko ezberdinetan izan den eta izaten jarraituko den jazarpen sistematikoa ere».
