Gure Esku plataforma subiranistak deia egin du «hemen nazio bat dagoela» erakusteko Espainiako Vuelta Euskal Herrian dabilen bitartean. Euskal Herria zazpi lurraldez osatua dela islatu dadin nahi du plataformak, «eta herri honek taupada bizia duela hori erakusteko».
Hala, errepide bazterrak Euskal Herria ordezkatzen duten ikurrez bete daitezen nahi du Gure Esku-k. «Txirrindularitza lasterketak kirol probak baino askoz gehiago dira euskal herritarrontzat, festa, komunitatea egiteko une eta gure herriaren erakusleiho bihurtu baikenituen aspaldi», helerazi dute ohar baten bidez. «Historikoki, txirrindularitza lasterketetan (Tourra, Vuelta, Itzulia…) euskal herritarrok geure herriaren taupada erakutsi izan diogu munduari: berezko hizkuntza eta kultura dituen nazio bat, bere ikurrak harro haizatzen dituena eta kirola grinaz eta errespetuz bizi duena».
Gure Esku-k gogoratu du apirilean ere egin zela horixe bera, Itzulian: errepideak ikurrinez eta nafar banderez bete zirela esan du, eta «munduari euskal taupada» erakutsi zitzaiola. Plataformak nahi du berriro ere ateratzea errepideetara, «eta adieraztea ozen bere etorkizuna libre eraiki nahi duen herri bat dagoela hemen». Hala, Gure Esku-k Vueltak zeharkatuko dituen errepide bazterrak ikurrinez eta nafar banderez betetzeko deia egin die herritarrei.
