Azaletik ama zelulak sortu dituzte, baina ezingo dira gaixoetan erabili

Giza obulu eta giza enbrioi berriak erabili gabe, zelula amak sortzeko modu bat aurkitu dutela esan du Harvardeko (Ameriketako Estatu Batuetako) Unibertsitateko ikertzaile talde batek. Edonola ere, zelulok ezingo dira erabili gaixoetan, anormaltasun genetikoa dutelako. Azaleko zelulak enbrioietako zelula amekin nahastu eta mugarik gabe haz daitekeen hibridoa sortu dute. Horrek aukera emango luke etorkizunean beste obulu edo enbrioirik erabili behar izan gabe nahi adina ama zelula sortzeko. Edonola ere, oraingoz ezingo da erabili gaixoetan, zelulok jatorrizko zelulen kromosomak ere badituztelako. Ostiralean emango du Science aldizkari entzutetsuak ikerketaren zehaztasunak.