Europako Batzordeak esan du gaitza ez dela Errumaniara iritsi oraindik

Gaitza Errumaniara iritsi zela zabaldu zuten herenegun hango agintariek, baina Europako Batzordeak gezurtatu egin zuen atzo. Philip Tod EBko Osasun komisarioaren arabera, Errumanian hilda agertu diren hegaztiei egin dizkieten analisiek ezezkoa eman dute. Europako Batzordeak hiru albaitari bidali zituen herenegun Errumaniara, ustezko kasuak aztertzeko.

Errumaniara ez, baina Turkiara bai. Turkiara iritsi da hegaztien gripea, Europaren arabera. Herenegun, Turkiatik hegazti biziak eta lumak inportatzea debekatu zuen Estrasburgok, gaitzari aurre egiteko. Atzo, debeku hori 2006. urteko apirila arte luzatzea erabaki zuen Europako Batzordeak. Debekuak basa hegaztiei eragiten die. Izan ere, Turkiak debekatuta zuen lehendik oilaskoak eta hegazti produktuak saltzea, ez baldin bazen behintzat %70ean tratatutako okela.