«Ez dugu esan nahi itsaslasterra geldituko dela, baina gure aurkikuntzek urduri jarri gaituzte», esan du Harry Bryden ozeanografoak. Brydenen taldeak egin du azterketa, eta Nature aldizkarian zabaldu ditu ondorioak. Azken 50 urteotako datuak erabili dituzte, eta neurketa gehiago egin dituzte Bahametatik Kanarietara, 25. paraleloari jarraika. «Emaitzak ustekabea izan dira», gaineratu du Brydenek.
Milioi bat zentralen pare
Karibe aldean hasten da golkoko itsaslasterra iparraldera egiten. New York eta Portugalen parera heltzen denean, bitan banatzen da, Atlantikoaren erdian. Adarretako batek berriz hegoaldera egiten du, eta tropikoetatik atera gabe ixten du biribila. Beste adarrak, ordea, iparraldera egiten du, Eskandinaviarantz. Ur beroa denez, ozeanoaren azalean mugitzen da, eta Europako airea berotzen du. Mendebaldeko haizeak euria eta lasterraren epeltasuna ekartzen dizkio Euskal Herriari neguan. Europako tenperaturak 5-10 gradu inguru igotzen ditu. «Ematen duen beroak milioi bat argindar zentralen parekoa da», esan du Bryden ozeanografoak.
Europako iparraldera heltzen denerako, ordea, asko hozten da ura, eta Islandia zein Groenlandia aldean ozeanoaren hondora sartzen da. Orduan abiatzen du itzulerako bidaia, Ipar Amerikako kostaldetik, 3.000 eta 5.000 metroko sakoneran.Azken hori neurtzean etorri da ustekabea. Kalkuluen arabera, %30 murriztu da lasterraren indarra, eta tropikoetan itzulia egiten duen adarra %30 indartu da. Ondorioz, Europara heltzen den ur epela asko gutxitu da: 20 milioi tona ur segundoko heltzen zen 1957. urtean; iaz, berriz, 14 milioi baino ez.«Txundigarria da informazioa, berez», esan du Detlef Quadfasel Hanburgoko (Alemania) Unibertsitateko ozeanografoak, «baina mezu garrantzitsua ere bada Kyotoko itunaren etorkizuna negoziatzen ari diren politikarientzat: gure klima aldatzen ari gara». Montrealen (Quebec) daude bilduta munduko ingurumen agintariak egun hauetan, Lurraren berotzearen aurkako nazioarteko hitzarmena nola bete eztabaidatzeko.
Gakoa gatzean datza
Zergatik murriztu da itsaslasterra, ordea? Zientzialari batzuek uste dutenez, baliteke lasterrak berezko ziklo bati jarraitzea. Michael Schlesinger zientzialariak frogatu zuen joan zen hamarkadan ipar Atlantikoko adarra indartu eta ahuldu egiten dela 70 urteko zikloan. Edonola ere, egungo aldaketak horrekin zerikusirik ez duela uste du Schlesingerrek berak. «Berezko zikloak hotzaldia eragin zuen 1970eko hamarkadaren erdia aldera, eta gero epelaldia, baina hemen berriz hotzaldia dugu», esan du. Lasterra sakonean moteltzea «froga argia» da gizakiek eragindako klima aldaketaren ondorioa dela esateko, gaineratu duenez.
Brydenen arabera, itsasoaren gatzean dago gakoa. Artikoko izotza urtzen ari denez eta hango ibaiak azkartzen, Atlantikoaren iparraldeko ura gezatzen ari da. Gatz gutxiago izanik, arinagoa da ura, eta lasterra ez da orain arte bezala hondoratzen, itzulerako bidea hartzeko.Golkoko itsaslasterrean gertaturiko aldaketek eragin zuten duela 110.000 urteko izotz aroa. Hollywoodeko The day after tomorrow (Etzi) filmean fantasia handiz erakutsi zuten nola gelditzen zen golkoko itsaslasterra eta izotza ipar hemisferioaz jabetzen zela.Klima, ordea, hori baino askoz konplexuagoa da. Baliteke Europako iparraldeko batez besteko tenperaturak lau edo bost gradu jaistea, nahiz eta Lurra berotzen jarraitu. Adituek ez dakite zer ekarriko duen itsaslasterra moteltzeak. «Ez da bat-bateko kontua izango, The day after tomorrow-n bezala, baizik eta hamarkada batekoa», dio Erresuma Batuko klimatologo Meric Srokoszek. «Ez gara beste izotz aro batez ari, baizik eta muturreko negu gorriagoaz».
KLIMA ALDAKETAREN GOI BILERA
AEBek gas isurketak %30 handituko dituzte 2012rako
Etsita dabil egunotan Klima Aldaketaren XI. Goi Bilerako parte-hartzaile asko. Kyotoko Protokoloa betearazteko bideak aztertzea eta 2012. urtetik aurrera hartu beharreko neurriak hitzartzea da Quebeceko bileraren helburua. Ameriketako Estatu Batuek, ordea, protokoloa sinatuko ez dutela berresteaz gain, hartan oinarrituriko inongo neurririk ez dutela onartuko iragarri dute. Horrez gain, George Bush presidenteak isuriak 2012. urterako %18 murrizteko ezarritako egitasmoa «Kyotokoa baino hobeto» funtzionatzen ari dela esan zuen Harlan Watson Washingtongo ordezkariak. AEBetako zientzialariek diotenez, isuriak %30 areagotuko dira. Europako Batasunean alde handiak daude estatuen artean. Alemania, Erresuma Batua eta Frantzia helburuak betetzeko bidean direla esan zuen atzo Bruselak. Espainiak huts egingo duela gaineratu zuen.
