Tolosak ere onartu egin du Bedaio auzoa Amezketari ematea. Aho batez onetsi du aldaketa Tolosako Udalak gaurko osoko bilkuran, eta, alde guztiak ados egonik, Gipuzkoako Foru Aldundiak du orain erabakimena. Ekainean hasi zen prozesua, eta bertan parte hartu dute Tolosako eta Amezketako udalek, Bedaioko bizilagunen ordezkariek eta alderdi politikoek. Denak jarri dira ados.
Aldaketa hori aspalditik eskatzen zuten Bedaioko biztanleek. Izan ere, Aralar mendiaren magalean dago Bedaio, ez du Tolosarekin inongo harreman geografikorik, eta ez dago Gipuzkoan bere udalerritik hain urrun dagoen beste auzorik. Hamasei kilometro daude Bedaiotik Tolosara; Amezketara, berriz, bederatzi.
Ehun biztanle inguru ditu Bedaiok, eta bizilagunek uste dute aldaketa horrek haien egunerokoa hobetuko duela. Hain zuzen, argudiatu dute Amezketan egiten dutela normalean bizimoduaren zati handi bat —bertan egiten dituzte erosketak, bertan eskolaratzen dituzte umeak...—, eta uste dute lan administratiboak erraztuko zaizkiela.
Prozesuaren espediente osoa aldundiari bidaliko diote orain, hark baitu dekretua sinatzeko eta aldaketa hori ofizial egiteko eskumen esklusiboa.
