«Aurten indarrak batu ditugu, eta Donostiako Aste Nagusiko mobilizazioa elkarrekin antolatu dugu», erran dute Sare Herritarreko kideek, gaur, abuztuaren 14rako mobilizaziora deitzeko agerraldian. Izan ere, lehendabiziko aldiz, Donostiako Piratekin batera antolatu dute urtez urte Donostiako kaitik abiatzen duten mobilizazioa, «ezinbestekoa» delako auzia «behingoz eta ahalik eta lasterren» bukatzea. Konponbide integrala eskatu dute, sufrimendua gibelean uzteko eta mobilizaziorik egin behar ez den Aste Nagusi bat ospatu ahal izateko.
Biktimen «erabilera politikoa» salatu dute gaurko agerraldian, baita aitortu gabe dauden horien «aitortza eta errekonozimendua» eskatu ere. «Helmugara iritsi behar dugu. Dagoeneko gehiegi luzatu da auzia, eta ezin dugu onartu gehiago luzatzea», adierazi dute.
Beraz, eta azkena izanen delako esperantzan, mobilizazioaren gaineko xehetasun batzuk eman dituzte: 19:30ean abiatuko da kaitik bertatik, eta «inoiz baino beharrezkoagoa» izanen da bakoitzak «bere aletxoa» jartzea. «Euskal preso, iheslari eta deportatuen auziari konponbidea emango diogu. Helmugara iritsiko gara!».
