Taxilarien Euskal Federazioak iragarri du gaur ere zerbitzua etengo dutela Donostian eta inguruetan, 18:00etatik 21:00etara. Guztira laurehun taxik etengo dute zerbitzua gaur, ostiralean egin moduan. Plataforma digitalen bidez jarduten diren ibilgailu gidaridunen (IG) «irregulartasunak» salatu nahi dituzte horrela, baita administrazioen erantzukizuna azpimarratu ere: «Administrazioek ez dute irregulartasunak geldiarazteko neurri egokirik hartu».
Oharrean zabaldu dutenez, ostiraleko eta gaurko etenaldiak «mobilizazioz betetako egutegi baten hasiera» dira. «Horrelako ekintzak aldizka egingo dira, eta areagotuz joango dira administrazioek araudia betetzeko neurri eraginkorrak hartu arte, eta sektorean lehia berdintasunean oinarritutako baldintzak bete arte». Urriaren 7an manifestazioa egingo dute Donostian.
Oihartzuna izan dute ostiraleko eta gaurko etenaldiek; izan ere, Zinemaldia izaten ari da Donostian, eta taxirik gabe geldituko dira erabiltzaile asko. Gainera, Donostiako aireportura bidaiak egiten dituzten Hondarribiko eta Irungo taxilariek ere egingo dute etena, eta federazioak nabarmendu du protestak «izaera unitarioa» hartu duela lurralde osoan.
Taxilarien Euskal Federazioak azaldu du azken hilabeteetan egin diren ikuskapenak berretsi egin dutela Uber eta antzeko zerbitzuek ez dutela araudia betetzen, eta egoera horri emandako erantzunak ez direla nahikoak izan. Hori dela eta, «ikuskatze lanak indartzea» eskatu du federazioak, eta plataforma digitalei «erantzukizun handiagoz jardutea» galdegin die: «Ez ditzatela arauditik kanpoko zerbitzuak eskaini».
