Ezkabia

Desagertutzat geneukan gaitza, desagertutzat gaitza izendatzen duen hitza ere. Gasteizko ikastetxe batean izan diren ezkabia kasuek, ordea, garbi utzi digute gaitzak hor dirauela zomorro-zomorro. Eta ez da guztiz galdu ezkabia, larruazaleko gaitza izendatzen duen hitza ere. Garai batean, eritasuna nahiko arrunta zenean, inbidiarekin lotutako esaera adierazkor askoa eman zuen: «Inbidia balitz ezkabia, makina batek eramango luke buruan zapia». Jakina da ezkabiak, sarri, ilearen galtzea dakarrela, eta ezkabiadunek zapi batekin estaltzen zituzten buru-soiltzeak. Hortik esaera. Bestalde, zerbait funts gutxikoa dela esateko, «ez du ezkabiak baino gehiago balio» esan ohi zen.

Azkenik, hona Luzaide aldean esaten zen (esaten den?) esaera: «Arno ta ogia Espainiara, ezkabia Frantziara!». Ona etxerako, txarra atzerrirako, alegia. Bi estatuen arteko mugak etxea eta atzerria bereizten zizkigun garaiko ezkabia, inondik ere.