Aitzakiak, bertuteak eta irudimena

Erromesaldia da. Negozioa. Dirua. Parentesia. Oasia. Haluzinazioa basamortuaren erdian. Holograma. Gaindosia. Erakusleihoa. Egun gutxiko klimaxa urte luze-luzearen barruan. Epela urte osoko neguaren erdian. Ikuskizuna. Aitzakia urte osoan euskal kulturarik kontsumitzen ez dutenentzat. Aitzakia urte guztian euskal kultura existituko ez balitz bezala jokatzen duten komunikabideentzat, euskaldunak eta haien gauzak existitzen direla aipatzeko. Aukera, apalak irakurriko edo entzungo ez diren liburuekin eta diskoekin hornituko dituztenentzat.Gogoan gorde ezin daitezkeen eta barneratu ezin diren berrikuntzen erakusleiho erraldoia. Zarata. Presak. Patxadarik eza. Jende zurrunbiloak eta korronteak. Masa. Errutina. Sormena, lan moldeak eta produkzioa behartzen dituen ekitaldia. Zerrendak. Homologazioa. Itxurakeria.

Durangoko Azokari aitzakiak jartzen hasita, nahi duenak horiek eta gehiago jar diezazkioke. Bertuteak eta ekarpenak zerrendatzen hasita, ordea, horiek baino gehiago eta sendoagoak dira, norbaitek zalantzaren bat baldin badu. Durangokoa azoka baita, zentzu guztietan. Azokak. Molde zaharrekoa eta molde berrikoa. Nahi duenak imajina dezala Durangoko Azokarik gabeko euskal kultura.