Tramankuluak

Das Leben der Anderen (Besteen bizitza) filma ikusi duenak badaki zer-nolako paranoia sor dakiokeen etengabe zigilatua izateko ustea duenari. Ohe azpian, bonbilla barruan edota mesanotxeari itsasita egon daiteke mikronofoa edo dena delako tramankulua. Das Leben der Anderen Ekialdeko Alemanian dago girotua, 1984an, erregimen komunistaren azken urteetan. Stasiren garaian. Mendebaldeko demokrazia kapitalistek behin eta berriro esan diguten bezala, estatu ez-demokratiko batean.

Bonifacio Vadillo eta Liher Gonzalez ez dira bizi izan Hoeneckerren Alemania hartan. Euskal Herria dute bizileku; estatu demokratiko bat dute askatasunen bermatzaile, eta ez lukete begiratu beharko ohe azpian, bonbilla barruan edota mesanotxean. Ez dira gaizkileak.

Baina begiratu, begiratu dute, eta aurkitu ere aurkitu dute. Tramankuluak jarri dizkiete autoetan, non dauden eta nora doazen jakiteko. Euskal preso baten eta preso ohi baten senideak dira Badillo eta Gonzalez.