Hasiera berria

Ez da kasualitatea, ezin da kasualitatea izan, Errusiak parte hartzeari uko egin dion hitzarmenaren izena Arma Estrategikoak Murrizteko Ituna izatea, ingelesezko siglek START hitza osatzen dutelako, zeinak, mundu guztiak dakienez, hasiera edo hasi esan nahi baitu.

Tratatuek, erakundeek eta abarrek dena delako hizkuntzan erraz ahoska daitezkeen siglak eta akronimoak hobesten dituzte, eta eman nahi duten irudia indar dezakeen hitz gogoangarria osatzen badute askoz hobe. ErNE du Ertzain Nazionalen Elkartasunak, ez dakit beren interesak ongi zaintzeko edo bijilante egoteko promesaz. ALAMAR deitzen da espainolezko Latino-Amerikar Armadoreen Elkartea, itsasoratzen dituzten ontziengatik dudarik gabe. Jende askok ez daki Elkar argitaletxearen izena ere akronimoa dela jatorriz, Euskal Liburu eta Kanten Argitaldariarena.

Gauzak horrela, argi dago munduari, edo beren buruari, zerbait adierazi nahi ziotela START hitzarmenari izena paratu ziotenek, halako itxaropen bat edo. Bitan berritu zuten AEBek eta Errusiak. Itunaren azken bertsioari, 2010ean Obamak eta Medvedevek sinatutakoari, New START deitzen zioten.

Etorkizunak, azkenean, zerbaiten hasierara eraman behar gaituela ematen du, bai, baina inolaz ere berri.