Ez daki bere izenik. Uste du Aner deitu ziola baten batek, baina izan zitekeen Ander, edo Ane, edo Han ergela! esan ei zion ondokoak. Ez daki nongoa den. Hizkerarengatik arabarra iruditu zitzaion, Gasteiz ingurukoa. Eta Gasteiz ez dago hain urruti, eta han gainera bizikletan joango litzateke lanera, eta gustatzen zaio Gasteiz. Ez daki jatorra ote den, feminista, zezenketen kontrakoa eta sanferminzalea, baina iruditzen zaio baietz, hori transmititu zion. Aurreko astean egin zuten topo ikastaro batean. Bere zenbakia du baina ez dio oraindik idatzi. Goizegi dela uste du, lehenengo pausoak garrantzitsuak direla, eta beste enkontru bat behar duela baieztatzeko. Ez diot ezer gehitu nahi. Zoragarria da ilusioaren atariko dagoenari begiratzea, entzutea nola ari den inpultso bat arrazionalizatu nahian, nola ez garen atrebitzen sentitzen, eta nola ezin dugun besterik egin. Ez du maitasun hitzik aipatu. Bihozkadez, intuizioaz eta jakin-minaz hitz egin du. Eta niri Gonzalo Torneren esaldi hura etorri zait gogora: Zer da maitasuna, jakin-min urduri eta goren bat ez bada?
Kurioski
Iruzkinak
Ez dago iruzkinik
Ordenatu
