Sexismoa

Hainbat akademikok igandeko El Paísen argitaratutako sexismo linguistikoari buruzko artikulua hauts asko harrotzen ari da gazteleraren munduan. Polemika ondo datorkio euskarari ere, sexismoaren itzala nonahi baita luzea. Akademikoen artikuluak onkeriaren izenean egindako gehiegikeriak salatzen zituen, eta gehiegikeriak salatzea beti da osasuntsu. Baina artikuluaren hondoan bazegoen filosofia bat oso arriskutsua —esentzialistaesan beharko nuke?— iruditzen zaidana: hizkuntzaren jenioa errebindikatzen zuten, hori zuten argudio nagusia, baina hizkuntza baten jenioak dena eman badezake ere, deus da berez. Hiztunok dugu —edo ez— jenio hori, hiztunok dugu —edo ez— hizkuntzaren dohaina. Baina dohainak dohain, hiztunok gizaki sozialak gara, ideologia baten edo bestearen jabe (eta mirabe!).

Eta hizkuntza ere gertakari soziala baita, gure jarduna da hizkuntza sexista edo ez-sexista izatearen erantzule, eta ez hizkuntza.