Zubian

Itzultzailearena —literatur itzultzailearena, bereziki— ez da gurean ez lanbide erraza, ezta lanbide txalotua ere. Gero eta sarriago aitortzen zaizkio azken urteotako jauzi kualitatiboa, euskara estandarrari egindako ekarria, literatura landu nahi dugunoi eskaintzen dizkigun eredu eta aukera gero eta ugariagoak. Aitormen gero eta zabalduagoa ez dator, ordea, batere bat itzulpenen onarpen praktikoaren galgarekin: irakurleak falta zaizkio, uzkur ditu editoreak. Onarpen instituzionala ere, antzeko: itzultzaileen presentziak hurbil du hutsaren hurrena euskararen etorkizunarekin zerikusia duten estamentuetan.

Iaztik itzultzaile profesional bat dago Espainiako Akademian. Bi motibo eman zituzten Miguel Sainz akademiko izendatu izana justifikatzeko: hizkuntzen arteko joan-etorri gero eta globalizatuagoak hizkuntzen gaurko garapenean duen eragina, eta fenomeno horren zubian itzultzaileek egiten duten lekukotza zuzena.