Zentroko bizilagunok etengabe kexatzen garen arren, eta Arartekoak Donostiako Udalari hots kutsadurari buruzko araudia betetzeko eta bizilagunon atsedenerako eskubidea bermatzeko eskatzen dion bi ebazpenei entzungor eginaz, kaleak garbitzeko udal zerbitzuak egunero urratzen du oinarrizko eskubide hori eta kalte larria egiten die herritarron osasunari eta ongizateari goizaldeko lehen orduetatik.
Donostiako erdiguneko bizilagunok urteak daramatzagu gure ongizatearen aurkako zarata maila onartezinei aurre egiten, udal gobernuak neurri eraginkorrik hartu gabe. Behin eta berriz errepikatzen den zabarkeria horrek gure frustrazioa indartu baino ez du egiten, eta agerian uzten du udalak bere herritarren behar oinarrizkoenekiko duen axolagabekeria.
Arartekoaren ebazpenak
Bizilagunok eskatuta, Arartekoak bi ebazpen eman ditu Donostiako Udalari eskatuz bideak garbitzeko zerbitzuak eragindako kutsadura akustikoari aurre egiteko premiazko neurriak hartzeko. Auzotarrok, babesik gabe eta etengabeko zaratak estututa, arazo larri horri premiazko konponbidea ematea eskatzen dugu. Izan ere, arazo horrek atsedenerako eskubidea urratzen baitigu eta zuzenean eragiten baitie gure osasunari eta bizi kalitateari.
016R-1753-15 zenbakidun ebazpena, 2016ko abenduaren 15ekoa: Arartekoak udalari eskatu zion garbiketa makinetan zarata neurketak egiteko eta indarrean dagoen araudia betetzeko eta bizilagunen oinarrizko eskubideak bermatzeko beharrezko neurri zuzentzaileak hartzeko.
2024IR-1268-23 zenbakidun ebazpena, 2024ko irailaren 10ekoa: Arartekoak udalari eskatu zion beharrezko neurriak har zitzala araudia salbuespenik gabe betetzeko eta aldez aurretik bete gabeko konpromisoei erantzuteko.
Errekerimendua udalari
Zentroko bizilagunok Donostiako Udalari eskatzen diogu heldu diezaion garbiketa zerbitzuek sortutako kutsadura akustikoaren gaiari eta araudia sistematikoki ez betetzearen gaiari, baita honako ekintza hauek premiaz ezartzeko, indarrean dagoen araudia betetzen dela bermatu eta atsedenerako dugun oinarrizko eskubidea bermatzeko:
1.- Neurketa akustikoak egitea: garbiketa makinek eta hondakinak biltzeko lanek sortutako zarataren benetako inpaktua ebaluatzeko beharrezko neurketak egitea.
Ezinbestekoa da udalak neurketa akustiko zehatzak egitea garbiketa makinek eta hondakinak biltzeko jarduerek sortzen duten zarataren benetako inpaktua zehazteko. Neurketa horiek egin gabe, ezinezkoa da egungo egoerari buruzko datuetan oinarritutako ebaluazio objektibo bat lortzea, eta horrek zaildu egiten du esku hartze eraginkorrak diseinatzea eta inplementatzea, bai eta hartutako neurri zuzentzaileak betetzen direla kontrolatzea eta horien eraginkortasuna denboran zehar zaintzea ere. Azterketa horiek funtsezkoak dira erabaki informatuak oinarritzeko eta araudia betetzen dela bermatzeko.
2.- Neurri zuzentzaileak hartzea: zarata mailak murrizteko ekintza eraginkorrak aplikatzea, araudian ezarritako mugetara egokituz eta, horrela, udal jarduerek herritarron bizi kalitatea errespetatzen dutela bermatuz.
Zarata iturriak kentzea lehentasun ukaezintzat hartu behar du udalak, baita horrek bideak garbitzeko erabiltzen diren teknologiak goitik behera aldatzea eskatzen badu ere. Ezin da onartu gobernuak beldur edo onarpen jarrera izatea osasun publikoari erasotzen dion hain arau hauste larriaren aurrean. Aldaketarekiko konpromiso horrek islatu behar du bizilagunon ongizatea babesteko eta hiri inguruneei merezi duten lasaitasuna eta duintasuna itzultzeko benetako borondatea.
3.- Auzotarrokin elkarrizketa aktiboa ezartzea: auzotarrokin komunikazio konstante eta eraikitzaileko espazio bat irekitzea, arazoaren konponbidea arintzeko eta hartutako neurriak ebaluatzeko.
Donostiako Udalak errespetuz jokatu behar du herritarrekiko, gure ekarpenak baloratu behar ditu eta onartu behar du auzo lantaldeak prestaturiko pertsonok osatzen ditugula, eta pertsona horien dedikazioak eta ezagutzek prozesua aberasten dutela. Funtsezkoa da gure proposamenak ez ezestea, sarritan azterketa zorrotz batek eta lanordu askok babesten baitituzte, eta horrek lagundu egiten du adostutako konponbideak bilatzen araudia benetan eta berehala betetzeko bidean aurrera egiteko, betiere informaziorako eskubidea sustatuz eta auzokideon arteko lankidetza sustatuz.
