Hasi da Euskaltzaleon Martxa
Milaka ahots elkartuko dira gaur Euskalgintzaren Kontseiluak Iruñean antolatutako martxan, 'Euskaraz bizitzeko behar den dena' lelopean. 17:10ean abiatuko dira hiru zutabeak, eta 18:00etan izango da amaiera ekitaldia, Gazteluko plazan.
Euskalgintzaren Kontseiluaren deiari erantzunez, Euskaltzaleon Martxa egingo dute gaur milaka lagunek Iruñean, Euskaraz bizitzeko behar den dena lelopean. 17:10ean abiatuko dira zutabeak: Askatasunaren plazatik, Antoniutti parketik eta Runa parketik; amaiera ekitaldia, berriz, Gazteluko plazan izango da, 18:00etan. Halere, euskaltzaleen aldarriek goizean goizetik blaitu dituzte hiriko kaleak, lehen ekitaldia 11:00etan hasi baita.
Askatasunaren plaza. Abiatu da zutabea, jende ugari bilduta; mila eta bi mila pertsona artean.
Antoniutti. Geldialdi bat egin dute kanturako. Xabier Leteren Xalbadorren heriotzean abesten ari dira ehunka ahots.
Antoniutti. Zutabe jendetsua sortu da.
Askatasunaren plaza. Euskaltzaletasunaren alde hitz egin dute bost eduki sortzailek: «Euskal herri euskalduna nahi badugu, sareetan ere euskarak presentzia behar du. Pantailen aroan ere euskaraz bizitzeko aukera ere izan dezagun».
Runa parkea. Entzierroaren ibilbidea egiten ari da Runako zutabea, eta pankarta bera ere sanferminetako peñen antzera daramate, txarangak lagunduta. Festa giroa nagusi da martxaren alde honetan. Alde Zaharrean barneratu da jende oldea, eta Udaletxe plazan sartzear dira euskaltzaleak. Euskal Herrian euskaraz! oihukatzen ari dira manifestariak.
Askatasunaren plaza. Pregoiarekin hastear daude Askatasunaren plazan. Agiria bost eduki sortzailek irakurriko dute: Iruñe Astizek, Maider Leonek, Aitziber Irazokik, Danel Sarasuak eta Andrea Gonzalezek. Txupinazoa, berriz, Ibai Romerok eta Irati Erauskinek jaurtiko dute.
Antoniutti. Bidean da Antoniuttiko zutabea, giro ederrean.
Runako parkea. Azterketak Euskaraz taldeko kideak igo dira agertokira pregoia irakurtzera: «Derrigorrezkoa iruditzen zaigu baxoa euskaraz izatea Euskal Herri euskalduna eta euskaltzalea lortzeko. Gure helburua lortu arte ez dugu amore emanen. Urte bukaerako probak euskaraz egitea ez da haur baten kapritxoa, ikasleon eskubide bat baizik. Aurten bururaino eraman dugu erronka. Atzo pasatu genuen matematikako proba berria. Gaia erdaraz eman digute baina guk euskaraz itzuli diegu».
Runako parkea. Baxoa euskaraz orain irakur daiteke zabaldu berri duten pankarta batean.
Antoniuttiko zutabea. Batuz Aldatuko talde eragilearen izenean, hitzartzea hasi dute Ines Castiellak (Nafar Ateneoko ordezkaria) eta Jasone Mendizabalek (Taupako ordezkaria).
Hasi da martxa. Abiatu dira hiru zutabeak, eta manifestariek ekin diete aurreneko aldarrikapen mezuei.
Politikarien adierazpenak: Euskal Herriko dozenaka ordezkari politiko ere bildu dira Euskalgintzaren Kontseiluak deitutako martxara. Hona hemen haietako batzuen adierazpenak:
- Ana Ollo (Nafarroako Gobernuko bigarren lehendakariordea): «Euskara den-dena da; Nafarroako ondarea da, ez soilik iraganekoa, baita etorkizunekoa ere. Are, lurralde kohesiorako tresna bat da, ez soilik euskaldunentzat, baita erdaldunentzat ere».
- Nerea Kortajarena (EH Bilduko kidea): «Hemen gaude sinestuta gaudelako euskarak bizi duen larrialdiak behar duela eskala handiko erreakzio bat. Oldarraldi antolatu baten aurrean gaude, baina uste dugu posible dela denon artean aurrera egitea, hizkunza politika berriak sustatzea, euskararentzako arkitektura berri bat sortzea eta euskararen aldeko militantzia aktiboa indartzea».
- Unai Hualde (Nafarroako Parlamentuko presidentea): «Euskararen aldeko aurrerapausoak emateko garaian gaude, bereziki Iparraldean eta Nafarroan. Aurten berrogei urte beteko dira Nafarroan zonifikazioaren legea indarrean dagoenetik, eta izugarrizko muga da euskararen garapenerako. Euskarak ez ditu hormak behar, euskarak zubiak behar ditu, baina gizartearen konplizitatea behar dugu horretarako».
- Mikel Asiain (Geroa Baiko parlamentaria): «Erabat bat gatoz gaurko hiru zutabeen leloekin: ofizialtasuna, beti aldarrikatu baititugu eskubide berberak Nafarroako herritar guztientzat eta zonifikazioaren desagerpena; jauzia hizkuntza politiketan, eta balioa eman nahi diogu azken 11 urteotan Nafarroan gertatu den aldaketari; eta euskaltzaletasuna».
Runako parkea. Txarangaren erritmoan dantzan dabiltza Runako parkean ere. Jende ilara handi bat ikus daiteke Iruñeko Alde Zaharretik ibaiertzeko eremura jaisten.
Antoniutti. Giro ederra dago Antoniuttin ere. Itzalaren bila, jende ugari ari da biltzen.
Runako parkea. Martxa hasteko minutu batzuk falta direla, dozenaka lagun daude Arga ibaiaren ertzeko Runako parkean. Gazteak gehienak, Azterketak Euskaraz mugimenduko ikasleek botako baitute txupinazoa. Jendea zuhaitzen itzalpean dago kukututa, bero sapaz babesteko. Txaranga hasi da giroa goxatzen, Xalala riki-riki eta Maite zaitut abestiak jotzen.
