Masterseko finala jokatu dute gaur Gasteizko Ogeta pilotalekuan Aimar Olaizolak eta Jose Javier Zabaletak osaturiko bikoteak, Danel Elezkanok eta Jon Mariezkurrenak osaturikoaren kontra. 22-10 nagusitu dira lehenak.
Azaroan erretiroa hartuko duela iragarri du Olaizolak aste honetan bertan, eta arreta fokua izan da gaurko partidan. Nagusi izan dira gorriak hasieratik. Eurek aukeraturiko pilotekin 5-0 jarri dira Olaizola eta Zabaleta, baina gero urdinek seina berdintzea lortu dute. Bazirudien lehia estua izango zela.
Ez, ordea. Gorriek berehala atera diete zazpi puntuko aldea Elezkano-Mariezkurrenari, eta hortik aurrera arazorik gabe nagusitu dira.
Ikusleek gogoz txalotu dituzte Olaizolaren tantoak, eta, azkenean, ikusi dute txapela janzten. Olaizolak profesional gisa irabazitako azkena izango da. Pozik zegoen pilotaria partidaren ostean: «Hobe horrela erretiratzea arrastaka baino», esan dio Euskal Telebistari.
Logroñon (Espainia) jokatuko du Olaizolak San Mateo txapelketa, eta azaroaren 13an, ibilbideko azken partida jokatuko du Goizuetan (Nafarroa), jaioterrian.
