Saiatu da, baina Alavesek ezin izan du miraria gauzatu Camp Noun. Celtaren aurka galdu ostean, Bartzelona ahalguztiduna hartu du gaur Coudeten taldeak, eta, lehen zatian ondo lehiatu bada ere, 3-1 galdu du. Bartzelonak, berriz, derrigor irabazi beharreko norgehiagoka zuen gaurkoa; izan ere, irudi kezkagarria eman zuen asteartean Txapeldunen Ligan Ingalaterrako Chelsea taldearen aurka. 3-0 galdu zuen.
Epaileak txistua jo eta 44 segundora, oraindik zenbait zale zelaira sartu eta eserlekuetan esertzeke zeudela, korner batean gola sartu du Pablo Ibañezek. Gogotik ospatu dute jokalariek. Erreakzio oldarkorra izan du Hansi Flicken taldeak, baina Alavesek berehala beste aukera bat izan du. Rebbachek, ordea, gehiegi gurutzatu du baloia, eta, beraz, ezerezean geratu da jokaldia.
Norgehiagoka hasiera bizia izan da, baina Alavesi gutxi iraun dio pozak: zortzigarren minutuan, Baldek Raphinhari area barrurantz egindako pase sakon baten ostean, hark erdiratu, eta Lamine Yamalek berdinketa ezarri du markagailuan, jaurtiketa indartsu bati esker. Hortik aurrera, Bartzelona izan da partidaren jabe, eta Alaves putrea mendialdean bezala kontraerasoan hozka egiteko zain geratu da. Estrategia horrek ia eman dizkio fruituak Arabako taldeari, baina kontraerasoko jokaldi on baten ostean, Joan Garciak bikain erantzun dio Jonnyren jaurtiketari. Bartzelonaren erantzuna berehalakoa izan da, eta Raphinharen erdiraketa bat errematatuta Olmok 2-1eko emaitza ezarri du markagailuan.
Blancoren hutsunea derbian
Bigarren zatian ez du aukerarik izan Alavesek, eta 81. minutuan Blancori txartel horia atera dio epaileak, bosgarrena. Ondorioz, Real Madrileko harrobian hazitako erdilariak ez du Realaren aurkako derbia jokatzerik izango. Hutsune garrantzitsua izango da Coudeten taldearentzat. Bigarren zatiaren amaieran, erasoko jokalari ia guztiak zelairatu ditu Coudetek, baina Londresen ez bezala, sendo aritu da Bartzelona atzealdean, Cubarsi eta Gerard Martin horma. Saiatu dira arabarrak baloia sakonean sartuz aurkariari min egiten, baina azken minutuan Laminek baloia luze eman dio Olmori, eta Kataluniako jokalariak Bartzelonaren hirugarren gola sartu du.
Ondorioz, Alavesek hirugarren partida jarraian galdu du. Oraintxe, hamalaugarren postuan dago, hamabost punturekin, eta lau puntura ditu jaitsiera postuak. Bartzelona, berriz, lider da bihar Real Madrilek Gironaren aurka jokatu beharreko norgehiagokaren faltan.
Bartzelona-Alaves
Bartzelona. Joan Garcia; Eric Garcia, Cubaersi, Gerard Martin, Balde; Casado, Bernal, Dani Olmo; Lamine, Raphinha eta Lewandowski.
Alaves. Jonny Otto, Tenaglia, Pacheco, Parada; Antonio Blanco, Pablo Ibañez, Denis Suarez; Calebe, Boye eta Rebbach.
Golak. 0-1: Pablo Ibañezek (1. min); 1-1: Lamine Yamalek (8. min); 2-1: Olmok (26. min); 3-1: Olmok. (93. min).
