Jokin Altuna berriz ere Lau eta Erdiko Txapelketako lau onenen artean izango da. Gaur, Eibarko (Gipuzkoa) Astelena pilotalekuan, Amezketakoak arazo handirik gabe irabazi dio Jon Ander Peñari (22-11). Altunak txapelketan jokatu dituen bi neurketak irabazi ditu; horrela, finalerdietarako sailkatu da, eta aukerarik gabe utzi du Aitor Elordi. Multzoko beste txartela norentzat izango den Peña II.ak eta Artolak datorren asten jokatuko duten norgehiagokan erabakiko da.
Altuna finalerdietara sailkatu izana ez da ezustekoa: zazpi aldiz jarraian jokatu du modalitate horretako finala. Dena den, gaur kezkatuta amaitu du, bizkarraren ezkerraldean duen kolpe bat dela eta. «Abuztutik nabil minez, eta kezkatuta nago; min egiten dit entrenatzekoan, baita lo egitekoan eta esnatzekoan ere», aitortu du. Partidako azken aurreko tantoan hormaren aurka jo du gorputz atal horrekin.
Neurketari dagokionez, 6-6 hasi ostean, Altunak nahi zuen jokoa egin du. Airez jokatzea eragotzi dio Peñari, eta Tolosakoa ez da eroso sentitu. Gainera, Amezketakoak asmatu egin du errematean.
