Arratek irabazi egin du, eta arnasa hartu

Arratek Asobal ligan jarraitzeko aurrerapausoa eman zuen atzo Guadalajaran (Espainia), etxeko taldeari 26-27 irabazita. Atzoko garaipenarekin, Eibarko taldeak lau puntura du Toledo, azken-aurreko sailkatua, Liga amaitzeko lau jardunaldi falta direla. Arratek, gainera, Espainiako taldea baino gol-alde hobea du. Beraz, Toledok eibartarrek baino bost puntu gehiago atera beharko lituzke azken lau partidetan Arrate Ohorezko B Mailara kondenatzeko. Zaila dirudi hori gertatzea. Batetik, zortzi puntu eskas geratzen direlako jokoan. Eta, bestetik, Toledoren jarduna Eibarko taldearena baino okerragoa ari delako izaten. Hala, okerrik ezean, Arrate Asobal ligan ariko da datorren denboraldian. Bederatzigarren sasoia izango du jarraian maila nagusian.

Atzoko partidari dagokionez, eibartarrek merezita irabazi zuten. Azken emaitza engainagarria da, 1-0koan ez beste, Arrate beti izan baitzen aurretik. Bederatzi golen aldea izan zuen (11-20), baina lasaitu eta garesti ordaintzekotan izan zen.