Geldiezin dabil Lugañene. Arraun Lagunak-ek beste behin irabazi du gaur, eta, beraz, bederatzi bandera astindu ditu jada aurtengo ligan, hamabi estropadatan. Arraunlariak Galiziako uretan jardun dira gaur, Boiron.
Juan Mari Etxabek prestatutako neskek asteburu biribila egin dute han, eta jada eskura dute Euskotren liga hirugarrenez irabaztea. Lau estropada falta diren honetan, Oriok baino zortzi puntu gehiago dituzte sailkapen nagusian, eta azkenaldian bolada bikainean daudela erakutsi dute, gainera.
Hala ere, oraindik bandera garrantzitsuak daude jokoan, Zarauzkoa eta Donostiakoa, eta gaur, beste behin, Oriok erakutsi du ez dagoela liderrarengandik horren urrun. Ziabogara parean iritsi dira bi ontzi indartsuenak, Oriok aurrea ere hartu du ziabogan, baina, azkenean, Arraun Lagunak traineru baten aldearekin gailendu da. Atzerago geratu da Tolosaldea, hamahiru segundora, eta baita Zumaia ere, hemezortzi segundora.
Kontuak estuago daude sailkapenaren behealdean. Zumaiak, hau da, laugarren sailkatuak ehunen batzuk soilik atera dizkie Astillerori eta Hibaikari, baina gaurko emaitzak modua emango dio laugarren postuan sendotzeko. Donostiarra eta Hondarribia dira azken bi sailkatuak, eta berdinduta daude, 30na punturekin.
