Hiru estropada eta hiru garaipen. Arraun Lagunak nagusi izan da Zierbenan (Bizkaia) jokatu den X. Petronor banderan ere, Euskotren Ligako hirugarren jardunaldian. Donostiarrek lehia bizia izan dute Tolosaldearekin, baina azkenean sei segundoko tartearekin helmugaratu dira.
Ziabogan bi segundo eskasekoa zen Lugañenek zuen tartea, eta zenbait unetan Tolosaldeak garaipena lortu zezakeela zirudien. Bigarren luzearen azken erdian, ordea, Arraun Lagunak-ek argi utzi du zergatik den liderra.
Dena den, gaur agerian geratu da ligako gainontzeko ontziak ere azkar dabiltzala. Lehen txandan aritu direnek denbora ederrak egin dituzte, eta emaitzetan ikusi da hori: Arraun Lagunak-en eta Tolosaldearen atzetik hirugarren eta laugarren izan dira Astillero eta San Juan, eta azkena bukatu du, berriz, aurreko estropadetan fin ibili den Orio. Bosgarren izan da Hibaika, seigarren Donostiarra eta zazpigarren Zumaia.
