Finalerdietara, eta itxura ona emanda gainera. Iñaki Artola Buruz Buruko Txapelketako finalerdietan izango da Peio Etxeberriari Eibarko Astelena pilotalekuan irabazi eta gero (22-14). Iker Larrazabalekin neurtuko ditu indarrak datorren igandean, Gasteizen.
Etxeberria irabazten hasi da (1-3), baina lehen tantoetatik nabaritu da Artola erosoago zebilela. Alegiarra nagusi izan da tantoetan, eta amaitzen ere asmatu du. Bolada ona hartu duenean, berehala zabaldu du tartea (8-3, 16-6). Fisikoki itxura bikaina eman du Artolak, eta ondo baliatu ditu Etxeberriak zenbait tantotan eman dizkion erraztasunak.
Zenoztarra ezinean aritu da azken tantoetara arte, baina partidan sartzen hasi denerako berandu zen (16-10). Pilotazaleek orduan ikusi dituzte tanto lehiatuenak. Nafarrak ez du sekula jokatu buruz buruko finalerdi bat.
Datorren asteburuan, lehen finalerdia Donostian jokatuko dute Altuna III.ak eta Lasok, larunbatean, eta bigarrena, igandean, Gasteizen, Artolak eta Larrazabalek.
