Pixkanaka, Espainiako Lehen Mailako futbolarien errutinara ohitzen ari da Asier Osanbela (Subitza, Nafarroa, 2007). Ofizioaren parte da, besteak beste, komunikabideekin solas egitea. Euskarazko lehen elkarrizketa luzea BERRIAri eskaini dio, eta hasieran zalantza egin du, behar bezala moldatuko zen ala ez. Bada, argitasunez erantzun die galderei, baita adeitasunez ere. Egoerari berehala hartu dio neurria. Zelaian ere, beste horrenbeste egin du sasoia hasi zenetik. Ez da denboraldi bat gehiago harentzat, aurrenekoa baitu Osasunaren lehen taldeko jokalari gisa. Ligako lau partida jokatu ditu orain arte, azkena titular gisa, eta gustura dago egindako jokoarekin. Catena zigortuta egonik, baliteke beste aukera bat izatea gaur, Mallorcaren zelaian (16:15, Movistar).
Zaleak pozarren daude Osanbela lehen taldean ikusita; aldiz, Osasunaren jarduna kezka iturri bilakatu da jardunaldiek aurrera egin ahala. Okerretik okerrera egin dute gorritxoek, eta jaitsiera postuen atarian iritsi dira hamalaugarren jardunaldira. Osanbelak aitortu du «egoera zailean» dagoela taldea, baina uste du jokalariek aldarte egokia dutela krisitik atera ahal izateko. «Konfiantzaz eta lasai gaude. Argi dugu lanean honela jarraituz gero gauzak laster aldatuko ditugula». Gorritxoek txakalaldi handiak izan dituzte bigarren zatietan, eta arreta hor dute jarria. «Lehen zati oso onak egin ostean, beherakadak etorri dira gero. Analisia eginda, jabetu gara arreta eta bizitasun handiagoz aritu behar dugula denok. Ezin dugu alferrik galdu lehen zatian egindako lan on guztia».
Alessio Lisci jo eta ke dabil konponbide bila. «Zuzenketa asko ari da egiten bigarren zatian gertatzen ari dena berriz gertatu ez dadin. Azkenean, puntu asko galdu ditugu arazo horren ondorioz». Jokalariek ez dute auzitan jartzen teknikari italiarraren jokamoldea. «Uste osoa dugu estilo egokia dela guretzat. Argi dugu Alessiok zer nahi duen, eta haren ideiak lantzen jarraitu behar dugu». Alta, zaleek orain arte oso gutxitan sentitu dute zirrara Osasuna jokatzen ikustean, eta horren jakitun da Osanbela. «Zaleak gure jokoarekin identifikatuta senti daitezen nahi dugu, eta oraindik ez dugu lortu hori. Hobetu beharreko zerbait da, garrantzi handia baitu».
Ez da garairik aproposena talde nagusian tokia egiteko. Azken hiru partidak aulkitik ikusi behar izan ditu harrobikoak. «Pazientzia izan behar dut. Azkenean, lehen urtea dut talde nagusian, eta aldaketa handia da. Hori bai, prest egon behar dut neurria emateko». Orain arte, 139 minutu igaro ditu zelaian, eta ondo baliatu ditu. Celtaren aurka, aurrenekoz jokatu zuen titular gisa, eta, taldeak kale egin arren, atzelari nafarrari ez zitzaion nabaritu hasiberria denik. «Orain arte, eroso eta gustura sentitu naiz. Titular gisa jokatu nuenean galdu egin genuen, baina ni oso ondo sentitu nintzen. Gozatu egin nuen. Ideiak garbi edukitzea da gakoa».
«Zaleak gure jokoarekin identifikatuta senti daitezen nahi dugu, eta oraindik ez dugu lortu hori. Hobetu beharreko zerbait da»
ASIER OSANBELA Osasunako jokalaria
Tarteka, bigarren taldearekin ere jokatu du Osanbelak. Alde horretatik, «denboraldi arraroa» ari da izaten. Baina geldi ez egotea da kontua. «Bi taldeen artean bezala zaude batzuetan, eta hori kudeatzea ez da erraza. Nahasgarria gerta daiteke. Baina gustura aritzen naiz bigarren taldearekin. Gainera, aurten erdiko atzelari gisa hasi naiz jokatzen, eta garrantzitsua da postu horretan pixkanaka esperientzia lortzea». Halaxe da; elitera jauzi egitea aski ez, eta zeregin berria hartu du zelaian. «Erdilari gisa aritu naiz azken urteetan, baina denboraldiaurrean nire kokapena atzeratzea erabaki zuten. Hasieran arazoren bat izan nuen kokapen aldetik eta atzera korri egiterakoan, baina, bestela, nahiko eroso sentitu naiz. Postu egokia izan daiteke niretzat».
Esker ona Arrasateri
Klubarentzat jokalari garrantzitsua da, eta, horren erakusgarri, kontratua 2029ra arte luzatu diote. «Konfiantza handia erakutsi didate. Nik beti esan dut Osasunan egon nahi dudala; ez dago etxean egotearen parekorik». Klubera hamar urterekin iritsi zen, eta koskaz koska igo da, goiko puntara iristeraino. «Sadarren jokatzea, etxekoen, lagunen eta zale guztien aurrean, amets bat betetzea izan da. Nire inguruko jendea oso gorritxoa da, eta oso berezia da zeinen harro dauden ikustea». Etorkizuneko urratsak Patxi Puñal eta Oier Sanjurjoren lorratzei jarraituz egin nahiko lituzke. «Haien gisako ezaugarriak dituzten etxeko jokalariei erreparatu izan diet beti».
Osasunarentzat berezia izango da gaur jokatuko duen partida, eta ez soilik jokoan izango diren puntuen balioagatik. Izan ere, Mallorcaren aulkian Jagoba Arrasate eseriko da. Hain justu, teknikari bizkaitarrak eman zion Osanbelari gorritxoen lehen taldean debuta egiteko aukera, duela bi denboraldi. «Jagobari beti eskertuko diot eman zidan aukera. Polita izango da berriro harekin elkartzea. Oraindik arraroa da hura Mallorcaren txandala jantzita ikustea». Hark alde egin zuela eta, ahuldu egin zen Osasunaren nukleo euskalduna. Baina euskarak oraindik badu tokia gorritxoen artean. «Taldean euskarak are indar handiagoa izatea gustatuko litzaidake. Dena den, hainbat jokalari eta langile gaude euskaraz dakigunak, eta edonoiz aritzen gara euskaraz hitz egiten».
ALAVES ETA ATHLETIC ETXETIK KANPO ARIKO DIRA GAUR
Alavesek eta Athleticek gaur jokatuko dituzte Espainiako Lehen Mailako hamalaugarren jardunaldiko partidak. Etxetik kanpo ariko dira biak: arabarrek Bartzelonaren zelaian jokatuko dute (16:15, DAZN), eta bizkaitarrek, Levanterenean (18:30, Movistar).
Helburu bera dute biek ala biek: bolada txarra etetea; ligan, Alavesek partida bakarra irabazi du azken bostetatik; Athleticek, berriz, bakarra irabazi du azken seietatik, Txapeldunen Ligakoak eta Espainiako ligakoak kontuan hartuta.
Athleticek aukera hobea du helburua lortzeko, Levante gaizki ari baita: azken-aurrena da, eta ez du irabazi azken bost jardunaldietan, lautan galdu baitu eta behin berdindu. Alavesek, ordea, erronka askoz zailagoa du, Bartzelona bigarren baita. Hala ere, kolpea hartu berri du Txapeldunen Ligan, Chelsearen aurka 3-0 galduta.
