Athletic Leganes baino gehiago izan da, eta merezimenduz eskuratu ditu San Mamesen jokoan izan diren hiru puntuak. Raul Garciaren golei eta Kepa Arrizabalagaren geldituei esker, 2-0 gailendu da. Garaipenarkin, Europa Leagueko kanporaketari begira dago taldea. Ostegunean hartuko du etxean Olympique Marsella. Leganesen aurka lortu duen emaitza nahikoa izango litzaioke kanporaketa gainditzeko —3-1 galdu zuen joanekoan—.
Partida hasi eta gutxira jarri zen aurretik Athletic markagailuan. Taldearen bigarren gol aukeran zulatu zuen atea Raul Garciak, buruz, De Marcosen erdiraketa bat baliatuta. 10. minutua zen.
Minutu gutxira handitu zuen aldea Athleticek. 17. minutuan, bigarrenez bidali zuen baloia sareetara Raul Garciak. Berriro ere, De Marcosen erdiraketa batek sortu zuen aukera, eskuin hegaletik; Raul Garciak boleaz errematatu zuen, eta Leganeseko atzelari bat jo ostean, beste behi jaurti zuen atera, zutoinaren ondora, ongi neurtuta.
Bi goleko aldearekin, Athleticek izan zuen hirugarrena egiteko modurik; baita Leganesek aldea murrizteko aukerarik ere. Kepak, baina, bi gelditu ikusgarri egin zituen atea hutsean mantentzeko.
Bigarren zatian ere, bi taldeak izan ziren arrisku egoerak sortzeko gai, baina Leganesek ez zuen lortu golik egitea eta Athleticen garaipena kolokan jartzea.
Jose Angel Ziganda 'Kuko' Athleticeko entrenatzaileak adierazi du esperotakoa baino errazago lortu duela taldeak irabaztea. "Fin aritu gara eta horrek lagundu egiten du partidak aurrera ateratzen. Beti zaude tentsioan, edozein jokalditan berriz sartu daitezkeelako partidan, baina egia da bi gol horren azkar sartu izanak aldea eman digula".
Atzoko emaitzak Olympiquen aurkako partidari aldarte hobearekin heltzeko balio diezaioke Athletici. Leganesi bi golak egin zizkion Raul Garciak, ordea, ezin izango du ostegunean jokatu, bostgarren txartel horia joaso zuelako joaneko neurketan.
