Belarriak estaliz sartu da helmugan Juan Ayuso (UAE). Maila handiko txirrindularia da, baina laudorio baino kritika gehiago entzun behar izan du azkenaldian. Besterentzat gogoz kontra egin ohi du lan, eta lider gisa gorabehera handiegiak izan ditu. Giroan hirugarren zihoan, harik eta azken txanpan guztiz hondoratu zen arte. Lasterketa ez zuen bukatu. Vueltan, berriz, oso goiz geratu da lasterketa irabazteko aukerarik gabe: atzo jokatu zen mendiko lehen etapa, eta Ayusok ia 12 minutu galdu zituen gainontzeko liderren aldean. Bada, egun bat geroago, bere onera itzuli da. Hainbeste, ezen ihesaldian sartu eta Cerlerko helmuga lehen postuan zeharkatu baitu. Vueltan podiuma zapaldutakoa da, baina gaurkoa du lehen etapa garaipena.
Azken hiru saioek UAE taldearen zigilua izan dute. Asteazkenean erlojuaren aurka nagusitu zen, eta atzo Jay Vineren eskutik irabazi zuen. Gaur ere ihesean ibili da Vine, baina bestelako zeregina izan du: mendiko puntuak pilatzea, eta nagusiki, Ayusori laguntzea. Lau mendateko etapa izan da, eta irabazleak azken mendatean eman du kolpe erabakigarria. Lehen izerdi tantak, ordea, etapa hasi berritan isuri ditu, tropeletik hanka egin nahian. Berez, Vismak ez zion ihesean jarduteko baimenik eman behar. Hori dela eta, lehen orduan bete-betean lehiatu behar izan du Ayusok, Canto mendatean gora. Ihesaldia hamahiru lagunek osatu dute azkenean, eta UAEko bikotea aurkariak baino gehiago zen, kopuruz zein indarrez. Ayusok birritan egin du eraso Cerlerren, eta bigarren oldarraldia bortitzegia izan da Marco Frigorentzat (Israel). Hura izan da Ayusori gehien eutsi diona. Hirugarren, berriz, Raul Garcia Pierna (Arkea) iritsi da.
Iheslarien arteko lehia alde batera utzita, etapak ez du aparteko zirrararik izan. Mendietan korritu duten bigarren etapa izan da, eta gaur ere apal antzean ibili dira faborito nagusiak. Joao Almeida (UAE) erlauntza astintzen saiatu da azken kilometroetan, baina egoera luze gabe baretu da. Jonas Vingegaardek (Visma) erantzun besterik ez du egin. Erakustaldiak, noizbait egitekotan, beranduago egingo ditu. Taldekideen abaroan eta aurkari nagusien aldamenean iritsi da helmugara. Mikel Landak (Soudal), berriz, atzo baino atzerapen handiagoa izan du: minutu bat atera diote sailkapen nagusiko indartsuenek. Vuelta ezin izan du nahi bezala prestatu, eta ohorezko postuak gero eta urrunago ditu. Hobe du etapen bila aritu.
Sailkapenaren buruan Torstein Traeenek (Bahrain) jarraitzen du. Atzo ihesaldiari esker bilakatu zen lider, eta defentsa saio sendoa egin du gaur. Tropelean tiraka izan ditu taldekideak, eta ez du arrakalarik izan Cerlerko igoeran. Bihar ere gorabeherarik gabe eutsi beharko lioke elastiko gorriari, esprinterrentzako etapa jokatuko baita Monzon eta Zaragoza artean.
