Berdinketa bat ere zulotik irteteko nahikoa izan daiteke. Baina horretarako Sportingek edo Getafek kale egitea beharrezkoa izango da: Sportingek galduz gero, Osasunak puntu bat nahikoa izango du, eta Sportingek galduko ez balu, Getafek Santanderren gutxienez bi goleko aldeaz galtzea beharko dute nafarrek. Gainera, hiru edo lau taldek puntu kopuru berdinarekin amaituz gero, Osasuna izango da kaltetua beti, eta Getaferekin soilik berdintzea izango litzateke Osasunak beharko lukeena. Gaur Real Madril mendean hartzen ez badute mailari eusteko aukerak asko murrizten zaizkiela argi dago, beraz. Eta horrexegatik, irabaztera zelairatuko da Osasuna, beste taldeen emaitzen zain geratzerik ez dute nahi eta. «Ni ez naiz izorrekin fidatzen. Gure partida irabazten ez badugu, gauzak asko okertzen direla uste dut. Inork ez gaitu lagunduko, baina helburua gure esku dago, eta hiru puntuak lortzea soilik amesten dugu», esan zuen herenegun Juanfranek honen harira, esaterako.
Iragan astean Osasunako jokalariak zein zaleak burumakur eta ezkor zeuden bitartean, aste honetan egundoko baikortasuna nabaritu da gorritxoen inguruan. Nou Campen 0-1 irabazi ostean helburua euren esku dagoela ikusteak itxaropena berreskurararazi die, eta gehiegizko baikortasuna ere sumatu da Iruñean. Badirudi etxean jokatzeagatik, eta zaleen laguntza izateagatik, Osasunak ezin duela kale egin, baina sasoi honetan Camachoren taldeak partida erabakigarri askotan egin du kale etxean-Sporting, Recreativo eta Malagaren aurka, adibidez-, eta hori ahaztea ez da komeni. Gainera, aurkariak ezer ez duela jokoan egia da, eta hori ere albiste ona da Osasunarentzat, baina Real Madrileko jokalarien kalitateak edonor ikara dezake, eta gaur Nafarroako Erresumara gerturatzen diren zaleek hobe dute azken minutua arte sufritzeko prest joatea. «Real Madrilek ez du ezer jokoan, baino ohorea dute eta Osasunaren inguruan baikortasun handiegia sumatu dut aste honetan. Euforia horrek ez dit beldurrik ematen, baina tentsioarekin aritzen garenean hobeto erantzuten du taldeak, eta konfiantza gehiegi izan dugunetan okerrago aritu izan gara. Inork ez dezala pentsa erraza izango denik irabaztea», esan zuen atzo Jose Antonio Camachok.
Baikortasuna bai, lasaikeria ez
Entrenatzaile espainiarrak ongi ezagutzen du Real Madril, eta badaki Raul, Guti, Huntelaar, Lass, Robben, Higuain eta enparaua ez direla denbora pasa etorriko. Hain hitzordu garrantzitsuaren atarian baikor eta itxaropentsu izatea ezinbestekoa da irabazteko, baina baikortasun hori lasaikeria bihurtzea barkaezina litzateke, eta sufritzeko prest zelairatu behar dute gaur gorritxoek. Real Madril edozer gauzatarako gai da. Eta hori sinesten ez duenak galde diezaiola Sergio Fernandezi, Osasunako erdiko atzelariak oso antzeko egoera bizi izan baitzuen iragan sasoian Zaragozan jokatzen zuenean. Real Madril Liga txapeldun gisa iritsi zen Zaragozara (Espainia), madrildarrek ez zuten ezer jokoan, baina bina amaitu zen Zaragozak eta Real Madrilek Romaredan jokatuzuten partida -Sergiok sartu zuen berdinketaren gola- eta berdinketa ez zen mailari eusteko nahikoa izan Zaragozarentzat.
