Futbolean ibilbide luzea du egina Iñaki Goikoetxeak (Deba, Gipuzkoa, 1982). Futbolari ohia da, analista aritutakoa, bigarren entrenatzaile izandakoa... Eta erronka berri bati heldu dio denboraldi honetan: Eibarreko lehen entrenatzaile ari da. Pasioz bizi du futbola, eta nabari zaio. Areitioko kirol hiriko bulego batean elkartu da kazetariarekin, nahiz eta berak «zelaiko lana» duen maite. Baikorra da, eta denboraldiak aurrera egin ahala hobeto ariko direla uste du. Orain hamabigarren dago Eibar, hamar punturekin. Hala ere, galdu egin ditu azken hiru partidak. Abenduaren 7an jokatuko du hurrengoa, Logroñoren aurka, etxetik at.
Zure ustez, nola aritu zarete orain arte?
Ondo. Egia da pixka bat irregularrak izan garela: denboraldi hasiera ez zen onena izan, gero momentu onak eduki genituen, eta azkenengo hiru jardunaldiak ere ez dira onenak izan. Baina pozik nago. Jokalarien jarrera ona da, eta astean zehar lan ona egiten dugu. Falta zaiguna da partidetan pixka bat gehiago ematea eta emaitzak hobeak izatea. Talde askok antzeko puntu kopurua dugu; uste dut lehia estua izango dela bukaeraraino.
Etxean garaipen bakarra lortu duzue, Deportivoren aurka. Garrantzitsua da Ipuruan sendoago aritzea?
Bai, hori da gure gabezietako bat. Uste dut etxetik kanpo ondo gabiltzala, emaitza onak lortu ditugu. Galdu dugunean ere, uste dut ondo lehiatu garela. Baina etxean pixka bat gehiago eman behar izan dugunetan edo balioarekin pixka bat biziago aritu behar izan dugunetan, akatsak egin ditugu. Horixe nahi dugu, baina ez gaude eroso.
Puntuak bildutako partida guztietan atea hutsean mantentzea lortu duzue. Funtsezkoa da hori?
Bai. Ditugun jokalariak eta baliabideak kontuan hartuta, ezinbestekoa da. Badakigu golak sartzea kostatzen zaigula; orduan, atea hutsean edukitzea oso-oso garrantzitsua da.
Hain zuzen, gol gutxi sartu dituzue, hamabi partidatan bost bakarrik. Ari zarete hori lantzen?
Bai, sasoi hasieratik ari gara, eta astero lantzen dugu. Uste dut poliki-poliki hobeto gaudela eta erasoan gauza gehiago egiten ditugula, baina oraindik ez da nahikoa. Horretan gabiltza.
Zer duzue hobetzeko?
Atzean, batez ere, area inguruko egoera guztietan dugu zer hobetua. Defentsan denboraldi hasieran ondo aritu ginen, eta orain markak ez ditugu ondo egiten, erdiraketa guztietan zerbait ateratzen dute... Hori sendotu behar dugu. Eta erasoan, berriz, mugimendu desberdinak egin behar ditugu baloiarekin, jende gehiagorekin iritsi areara, erdiraketa hobeak egin... Hori guztia. Bi areatan hobetu behar dugu.
Gol gehienak bigarren zatian sartu dizkizuete, horietako asko partida hasi eta gutxira. Horri erreparatu diozue?
Bai, egia da lehenengo zatietan normalean ondo aritu garela, eta atsedenalditik bueltan, batez ere lehenengo minutuetan, askotan sartu digutela gola; ez dakit zergatik, horretan gabiltza buru-belarri. Gainera, gola sartzen digutenean, zoratu egiten gara: gauzak azkarregi egin nahi ditugu, eta sufritzen dugu. Oreka lortu behar dugu. Lasai egon, eta gure momentua bilatu aurkariari min egiteko.
Etenalditik bueltan, Logroñori egingo diozue bisita. Jaitsiera postuetan dago; inportantea izango da hiru puntuak eskuratzea?
Bai, baina batez ere garrantzitsua izango da ez galtzea. Liga oraindik luzea da, bost punturen aldea dugu, eta etxetik kanpo jokatuko dugu. Haiek behar handiagoa dute. Urduriago egongo dira, seguruenik, oraindik ez dutelako partidarik irabazi. Neurketa guztian egon behar dugu adi, eta uste dut irabazteko aukera asko izango ditugula.
Mailari eusteaz gain, baduzue beste helbururik ezarrita?
Helburu nagusia mailari eustea da, baina ez bakarra. Baloia denbora luzeagoan eduki, eta erasokorragoak izan nahi dugu. Hori landu nahi dugu, hurrengo denboraldirako edo beste momentu batzuetarako baliagarria izan dadin. Eta Espainiako Koparako ilusioa ere badaukagu.
«Badakigu golak sartzea kostatzen zaigula; orduan, atea hutsean edukitzea oso-oso garrantzitsua da»
Kargua hartutakoan adierazi zenuen aurreko urteko dinamikari eutsi nahi zeniola baina entrenatzaile bakoitzak bere libreta duela. Zer ezaugarri dituzu zuk?
Aurkarien zelaian pixka bat gehiago jokatu nahi dugu, eta baloia luzaroagoan eduki. Ari gara, baina ez da erraza. Hasieran beste sistema batekin jokatu nahi genuen, baina jokalariak ohituta zeuden atzeko bosteko lerroarekin jokatzera, eta erabaki genuen hori zela onena, oraingoz behintzat, taldeari sendotasuna emateko. Baina poliki-poliki gauza gehiago egin nahi ditugu: baloia daukagunean erasokorragoak izan, jaurtiketa gehiago egin, gol gehiago sartu... Askotan urduri jartzen gara eta ez dakigu baloiarekin zer egin.
Denbora behar da horretarako?
Denerako behar da. Egia da denbora pasatzen ari dela eta ez garela nahi genuena lortzen ari, eta horrek zer pentsatua ematen digu. Ari gara lortzeko moduak bilatu nahian.
Zer sistema zenuen hasieran buruan?
4-4-2 edo 4-3-3 jokatzeko ohitura dut. Uste dut egokiagoa dela aurkariaren zelaian gehiago jokatzeko eta abar. Baina talde berri batera zoazenean, begiratu behar duzu zer jokalari dituzun, zein baliabide dituzun, jokalari bakoitzaren jokatzeko modua zein den... Eta ikusi genuen bosteko lerroarekin, atzean behintzat, sendoagoak ginela, eta erasoan ere zenbait gauza egin genitzakeela.
Dezente aldatu da taldea aurreko sasoitik hona: askok utzi dute Eibar, eta fitxaketa asko egin dira. Baiezkoa emandakoan bazenuen egoeraren berri?
Bai. Banekien taldea ia berria izango zela, baina esan zidaten multzo polita osatuko genuela. Gazte asko daude, bigarren mailatik igotako jokalari asko ere bai. Ilusioa edukiko zutela banekien, eta nik ere nahi nuen talde berri batera joanda jendea gogoz egotea.
Suposatzen dut hasieran lan egin beharko zenuela egokitzeko eta elkar ezagutzeko. Uste duzu nabarituko dela, denboraldiak aurrera egin ahala?
Bai. Realean egon nintzenetik pila bat aldatu da liga [bigarren entrenatzaile izan zen hiru denboraldiz, 2018tik 2020ra bitarte]. Jokalariak askoz hobeak dira teknikoki eta taktikoki, eta oso entrenatzaile onak daude. Oraindik gauza asko ditugu hobetzeko, baina uste dut bide onetik goazela eta bigarren itzulirako hobeto egongo garela.
Talde gaztea du Eibarrek. Horrek zer du ona eta zer txarra?
Ilusioa dute, hobetzeko gogoa. Asko aurrez lehenengo mailan jokatu gabeak dira, eta maila nagusian gelditzeko gosea dute. Hori entrenamendu guztietan ikusten da. Alde txarra esperientzia falta da. Ligan dauden talde gehienek eskarmentu handiko jokalariak dituzte, eta detaile batzuetan antzematen da. Hain justu, askotan detaile horien ondorioz sartzen dizkigute golak.
Jokalari batek bereziki harritu zaitu?
Eunate atezaina guretzako egundokoa da. Banekien jokalari ona zela, baina... Oso gaztea da, Espainiako selekzioan dago, eta hobetzeko gogo handia du. Pila bat haserretzen da galtzen dugunean; bizi du futbola. Horrek harritu ninduen gehien.
«Kilometro gutxian lehen mailako hiru talde daude, eta normalean jokalari onenak Realak edo Athleticek hartzen ditu»
Harrobiko bi jokalari lehen taldera igo dira denboraldi honetan, eta ari dira jokatzen: Marta Lopez de Gereñu eta Malen Uranga. Harrobiari garrantzia ematen diozu?
Bai, bai. Eibarrentzat zaila da, Reala eta Athletic ere hor daudelako. Kilometro gutxian lehen mailako hiru talde daude, eta normalean jokalari onenak haiek hartzen dituzte. Testuingurua ikusita, lan oso ona egiten ari dira. Eibarren etorkizunean horrek izan behar du bidea eta oinarria: harrobiko jendeak jauzia eman, eta kanpoko jendea fitxatu. Guk aukera daukagu Realean edo Athleticen kontuan hartzen ez dituzten jokalariak Eibarreko harrobian sendotu eta lehenengo mailara igotzeko.
Eskarmentua duzu aulkian, baina aurrenekoz ari zara lehen entrenatzaile lanetan maila nagusian. Zer moduz?
Gustura. Uste dut geroz eta hobeto ari naizela. Hasieran, eskaintzak harritu egin ninduen. Realean egon nintzenetik bost urte pasatu dira, eta ez neukan buruan nesken futbolera itzultzea, baina ilusio handia egin zidan. Baliabide oso onak genituen gauza politak egiteko, eta azkenean aurrerapauso hori eman nuen. Eibar lehenengo mailan egonkortuta-edo dago, urte batzuk badaramatza. Gainera, kirol hiri berria dute, instalazio oso onak, etxetik gertu dut... Hori ere garrantzitsua da.
Denboraldi baterako kontratua sinatu zenuen. Dena ondo joanez gero, segituko zenuke?
Bai, dudarik gabe. Oso gustura nago Eibarren: bai instalazioekin, bai jokalariekin, bai talde teknikoarekin, bai zuzendaritzarekin... guztiekin. Niregatik izango balitz, urte askoan egongo nintzateke hemen.
