Bihar goizaldean hasiko da Australian sasoiko lehen Grand Slama

Australiako Irekia, denboraldiko lehen Grand Slama, bihar goizaldera hasiko da Melbourne Parken. Faboritoei dagokienez, lau dira guztien gainetik daudenak: Rafa Nadal, Roger Federer, Novak Djokovic eta Andy Murray. Nadal munduko lehen zerrendaburua da, eta 2009an irabazi zuen Australiako Irekia. Federer, berriz, iaz gailendu zen (baita 2004, 2006 eta 2007an ere), eta sasoiko dago. Djokovicek orain hiru urte eskuratu zuen titulua, eta Murrayk edonori lanak emateko moduan dagoela erakutsi du. Emakumezkoetan, bestalde, hainbat dira irabazteko hautagai nagusiak: Kim Clijsters, Justine Henin, Ana Ivanovic, Maria Sharapova... Serena Williams iazko txapelduna ez da ariko, min hartuta dagoelako.

Sariak inoizko handienak izango dira, iaz baino %3,8 gehiago. Guztira 28,2 milioi euro xahutu dituzte sarietan, eta irabazleak 1,3 milioi euro jasoko ditu.