Curaçao zeresana ematen ari da: inoiz Munduko Kopa jokatu duen herrialde txikiena dela batetik, elastiko politena eurena dela bestetik... baina, gaur, Venezuelaren iparraldean kokatzen den uharte horretako selekzioak erakutsi du futbolean jokatzen ere badakiela, eta inork ez diola oparitu Munduko Koparako txartela: hutsean berdindu du Ekuadorren aurka, eta egoera txarrean utzi du Caicedo, Valencia eta konpainiaren selekzioa.
Ikusi gehiago
Curaçaoren balentriak protagonista argia izan du: Eloy Room atezaina. Hamabost geldiketa egin ditu Kansas Cityn (AEBak) jokatu den neurketan, eta euren onetik atera ditu aurkariak. Ekuadorren setioa etengabea izan da partida osoan, gola lehenago edo geroago iritsiko zela zirudien, baina ez da hala izan, eta, tartean, bigarren zatian, Curaçaok ere izan du gola sartzeko aukera hirukoitz bat. Horixe bakarrik falta izan zaio festa biribiltzeko.
Alemania 2-1 Boli Kosta
E multzoko beste partidan, Toronton (Kanada), final hamaseirenetarako txartela ziurtatu du Alemaniak. Gogotik sufrituta: Kessiéren gol bati esker irabazten hasi da Boli Kosta, eta Alemaniak Deniz Undavek 94. minutuan sartutako golarekin eman dio buelta markagailuari. Stuttgarteko aurrelariak sartu du Mannschaft-en lehen gola ere 60. minutuan, aulkitik zelaira atera berritan.
Gaurko emaitzei esker, Alemania izango da multzoko lehen sailkatua. Boli Kostak, berriz, Curaçaoren kontra puntu bat gutxienez eskuratu beharko du bigarren postua lortzeko.
Herbehereak 5-1 Suedia
F multzoan indar erakustaldi bana egin dute Herbehereek eta Japoniak. Lehen jardunaldian elkarren aurka berdindu zuten, ez zituzten sortu zitzaketeen zalantzak uxatu, baina bestelakoa egin dute gaur. Bereziki Ronald Koemanen Herbehereek, Suediari 5-1 gailenduta Houstonen (AEBak).
Bina gol sartu dituzte Cody Gakpok eta Brian Brobbeyk, eta beste bat Crysencio Summervillek. Hasiera-hasieratik hartu dute aurrea, gainera: 5. minutuan heldu da lehen gola, eta 15.ean bigarrena. Bigarren zatian are gehiago zabaldu dute tartea, eta ondo bideratua utzi dute final hamaseirenetarako bidea.
Japonia 4-0 Tunisia
Munduko Kopatik kanpo Tunisia geratu da. Take Kubo Realeko jokalaria gabe, Japoniak egurra eman dio Afrikako selekzioari Monterreyn (Mexiko). Lehen zatian Kamadak eta Uedak egin dituzte golak, eta, bigarrenean, Itok eta, berriz ere, Uedak.
Japonia hobea izan da partida osoan. Uneoro kontrolpean izan du neurketa, eta ezinean aritu da Tunisia. Azken jardunaldiaren faltan, ikusteke dago F multzoko lehen hiru postuak nola banatuko dituzten Herbehereek, Japoniak eta Suediak.
