Donetsk Ukrainako taldea izango du aurkari Bilbo Basketek Eurocupen

BC Donetsk. Horixe da Eurocupeko ligaxka jokatu ahal izateko Bilbo Basketek atarikoan kanporatu beharko duen aurkaria. Zozketan zeuden taldeak kontuan hartuta, ezin da esan Bilboko taldeak zorte ona izan zuenik. Txarra izan zuela ere gehitxo esatea litzateke. Erdibideko taldea da Ukrainakoa, ez samurra, ezta gogorra ere. Deserosoa da BC Donetsk definitzeko hitz egokiena. Deserosoa baita Bilbo Basketen kontrarioa. Batetik, talde txukuna baitu. Bestetik, Ukrainarako bidaia luzea eta gogorra baita. Hain zuzen ere, Ukrainan jokatuko du Bilbo Basketek kanporaketako joaneko partida, urriaren 20an. Itzuliko partida, berriz, astebete geroago jokatuko du Euskal Herrian. Partiden ordenan bai izan zuen zortea Txus Bidorretak zuzendutako taldeak.

Donetsk taldea orain hiru urte sortu zen, eta ordutik mugarriz mugarri joan da. Lehen sasoian, Bigarren Mailara igo zen; bigarren sasoian, Lehen Mailara; eta azken sasoian, bigarren izan zen -Azovmahsek irabazi zuen Liga-. Iragan denboraldian, gainera, Europako Challengea jokatzeko gonbita jaso zuen, eta bide laburra egin zuen, Proteas Zipreko taldeak lehen kanporaketan utzi baitzuen lehiaketatik kanpo.

Taldeari dagokionez, lau jokalari nabarmentzen dira: Andreas Rodriguez joko antolatzaile puertorricarra, P.J. Tucker eskolta estatubatuarra, Chris Owens hegal-pibot estatubatuarra eta Demetrius Alexander hegaleko pibot estatubatuarra. Owensek eta Alexanderrek eskarmentua dute ACB ligan, Granadan batak; Valladoliden eta Cajasolen besteak.

Javi Rodriguez, fitxatuta

Bestalde, Bilbo Basketek atzo jakinarazi zuen Javi Rodriguez joko antolatzaile galiziarrak Bilbon jokatuko duela. Rodriguezek 30 urte ditu, eta eskarmentu handia ACB ligan, hamar denboraldiz jokatu baitu, Baskoniarekin debuta egin zuenetik. Iragan denboraldian 6,8 puntu eta 6,1 asistentzia lortu zituen partidako. Bilbo Basketen bigarren fitxaketa da Rodriguezena. Chris Warren eskolta estatubatuarra izan zen lehena.